5 сакавіка 2016 года ў Беларускім дзяржаўным універсітэце на факультэце міжнародных адносін па ініцыятыве дэкана факультэта прафесара В. Г. Шадурскага і кафедры германскіх моў адбылася сустрэча пасла Федэратыўнай Рэспублікі Германія ў Рэспубліцы Беларусь Петэра Дэтмара са студэнтамі, выкладчыкамі і кіраўніцтвам факультэта.
Петэр Дэтмар узначальвае пасольства Германіі ў Беларусі з верасня 2015 года. Наша краіна яму добра вядома, бо ў 2009—2013 гадах дыпламат ужо працаваў у пасольстве Германіі ў Мінску, дзе займаў пасаду дарадцы-пасланніка. Петэр Дэтмар нарадзіўся 4 верасня 1953 г. у Браунлаге. Вывучаў эканоміку і паліталогію. На дыпламатычнай службе з 1982 года. Працаваў у Федэральным міністэрстве замежных спраў на розных пасадах, у пастаянным прадстаўніцтве пры ЕС у Брусэлі (1983—1986), пасольствах у Буркіна-Фасо (1986—1989), Нідэрляндах (2001—2004), Расіі (2004—2008), Беларусі ( 2009—2013 і з верасня 2015 года), генеральным консульстве ў Мілане (2013—2015).
Асноўнай мэтай візіту пасла была сустрэча з кіраўніцтвам, студэнтамі і выкладчыкамі факультэта міжнародных адносін. Менавіта на дадзеным факультэце рэалізуецца шэраг адукацыйных праграм, куратарам якіх побач з Гётэ-інстытутам і Германскай службай акадэмічных абменаў (DAAD) з'яўляецца пасольства Германіі ў Рэспубліцы Беларусь. Пасол прывітаў студэнтаў, выкладчыкаў і дэкана факультэта і распавёў аб сяброўскіх адносінах паміж нашымі дзвюма краінамі. У сваім выступе Петэр Дэтмар закрануў пытанні палітычных адносін, супрацоўніцтва ў галіне эканомікі і культуры, навукова-тэхнічнай дзейнасці, адукацыі. Пасол падкрэсліў, што сваю асноўную задачу ён бачыць у падтрымцы інтэнсіфікацыі ўсюды, дзе гэта толькі магчыма, двухбаковых адносінаў паміж нашымі краінамі па ўсёй шырокай палітры тэм. Таксама пасол узгадаў аб той станоўчай ролі, якую прэзідэнт Рэспублікі Беларусь А. Р. Лукашэнка сыграў ва ўкраінскім працэсе, калі была прадастаўлена мінская пляцоўка для правядзення перамоў, паўстаў новы фактар, які, безумоўна, станоўчым чынам адбіўся на развіцці адносін паміж Беларуссю і ЕС.
Падчас гэтай сустрэчы студэнты мелі магчымасць задаць свае пытанні. Пасол ахвотна адказаў на ўсе пытанні, падрабязна закрануў студэнцкія летнія праграмы ў Германіі.
У заключэнне пасол, адказваючы на пытанне студэнткі, падзяліўся формулай свайго асабістага поспеху: «Раніцай, гледзячы на сябе ў люстэрка, Вы павінны адчуваць сябе шчаслівым чалавекам, таму што ўсё, што ў Вас ёсць, Вы атрымалі не дзякуючы чыёй-небудзь падтрымцы або сувязям, а ўпартай працай і годнымі паводзінам».
{gallery}2016/2016_03_05{/gallery}