На факультэце міжнародных адносін БДУ 3 снежня 2024 г. прайшоў II Міждысцыплінарны семінар па пытаннях развіцця інклюзіўнага турызму ў Беларусі і свеце. Гэта мерапрыемства было арганізавана кафедрай міжнароднага турызму і гасціннасці ФМА БДУ сумесна з Дэпартаментам па турызме Міністэрства спорту і турызму Рэспублікі Беларусь і Дзяржаўнай установай "Нацыянальнае агенцтва па турызме". Дата правядзення была абрана не выпадкова. Ва ўсім свеце 3 снежня адзначаецца Міжнародны дзень інвалідаў, абвешчаны ААН яшчэ ў 1992 годзе.
Міждысцыплінарны семінар па пытаннях развіцця інклюзіўнага турызму праводзіцца на факультэце міжнародных адносін ужо другі раз (першы семінар адбыўся ў 2021 годзе). На гэты раз семінар праходзіў у гібрыдным фармаце (афлайн і анлайн) і аб'яднаў больш за 90 удзельнікаў.
Праграма семінара была насычанай. Разглядаліся пытанні падрыхтоўкі спецыялістаў у сферы турызму, якія валодаюць ведамі і навыкамі для работы з людзьмі з асаблівымі патрэбамі. Быў прадстаўлены вопыт такіх універсітэтаў як Беларускі дзяржаўны ўніверсітэт, Расійскі эканамічны ўніверсітэт ім. Г.У. Пляханава, Беларускі дзяржаўны ўніверсітэт культуры і мастацтваў, Баранавіцкі дзяржаўны ўніверсітэт, Беларускі дзяржаўны ўніверсітэт фізічнай культуры. Сярод спікераў былі спецыялісты са сферы турызму, якія прадставілі вопыт турыстычных аб'ектаў і ініцыятыў, арыентаваных на аказанне інклюзіўных турыстычных паслуг, такіх як Цэнтр крэатыўных рашэнняў "Нябачны свет", музей "Замкавы комплекс "Мір", турыстычны маршрут "Даступная гісторыя Ваўкавыска", інфацэнтр Валожынскага раёна, Жлобінскі гісторыка-краязнаўчы музей. У практычным блоку ўдзельнікі пагрузіліся ў асаблівасці такой прылады інклюзіўнай камунікацыі як ясная мова, а таксама наведалі экскурсію «Пл. Незалежнасці на яснай рускай мове» з рэкамендацыямі па інклюзіўнай камунікацыі для спецыялістаў сферы турызму.
Варта адзначыць, што кафедра міжнароднага турызму і гасціннасці ФМА БДУ мае значны вопыт у галіне даследаванняў інклюзіўнага турызму і падрыхтоўкі будучых спецыялістаў, якія маюць навыкі працы з людзьмі з асаблівымі патрэбамі і разуменнем інклюзіўнага падыходу. Так, на кафедры працуе адзін з асноўных экспертаў у галіне інклюзіўнага турызму ў Беларусі – к.э.н., дацэнт Барысенка Н.М., якая абараніла дысертацыю па гэтай праблематыцы. На кафедры выкладаюцца тры дысцыпліны, звязаныя з дадзенай тэматыкай, вядуцца даследаванні ў рамках дыпломных і магістарскіх дысертацый, у тым ліку на замову арганізацый. Пад кіраўніцтвам дацэнта Барысенкі Н.М. у 2016 годзе тэма інклюзіўнага турызму была ўкаранёна ў дзейнасць Студэнцкай навукова-даследчай лабараторыі "Інавацыі ў турызме".
У цэлым семінар стаў міждысцыплінарнай пляцоўкай для абмену ведамі і вопытам па пытаннях развіцця інклюзіўнага турызму ў Беларусі. Змешаны фармат мерапрыемства дазволіў ахапіць значную колькасць удзельнікаў, у тым ліку з рэгіёнаў. Па выніках работы семінара ў бібліятэцы БДУ будзе апублікаваны электронны зборнік матэрыялаў.
Выказваем падзяку Дэпартаменту па турызме Міністэрства спорту і турызму Рэспублікі Беларусь і ДУ "Нацыянальнае агенцтва па турызме" за актыўны ўдзел у арганізацыі і правядзенні семінара.
{gallery}2024/2024_12_03{/gallery}