Факультэт міжнародных адносін БДУ сумесна з Дэпартаментам па турызме Міністэрства спорту і турызму Рэспублікі Беларусь і Дзяржаўнай установай "Нацыянальнае агенцтва па турызме" праводзіць II Міждысцыплінарны семінар па пытаннях развіцця інклюзіўнага турызму ў Беларусі і свеце, які адбудзецца 3 снежня 2024 г. Дата правядзення семінара прымеркавана да Міжнароднага дня інвалідаў, абвешчанага ААН. Асноўная мэта семінара — абмеркаванне лепшых міжнародных і беларускіх практык у сферы інклюзіўнага турызму.
Развіццё інклюзіўнага турызму – адзін з важных напрамкаў развіцця турыстычнага рынку Беларусі, што ў многім абумоўлена ратыфікацыяй Канвенцыі ААН аб правах інвалідаў у 2016 г. і прыняццем Нацыянальнага плана дзеянняў па рэалізацыі ў Рэспубліцы Беларусь палажэнняў Канвенцыі аб правах інвалідаў на 2017-2025 гады. У перыяд з 2015 г. і па цяперашні час кафедрай міжнароднага турызму ФМА БДУ праводзяцца даследаванні ў галіне інклюзіўнага турызму ў міжнародным і нацыянальным кантэксце, у якіх прымаюць удзел як выкладчыкі, так і студэнты (у рамках Студэнцкай навукова-даследчай лабараторыі "Інавацыі ў турызме").
Забеспячэнне даступнасці турызму для людзей з асаблівымі патрэбамі прадугледжвае сумесныя дзеянні прадстаўнікоў розных сфер, таму семінар мае міждысцыплінарны характар. Сярод выступоўцаў чакаюцца прадстаўнікі сферы адукацыі, профільных дзяржаўных арганізацый, спецыялісты-практыкі ў сферы турызму, экскурсаводы і прадстаўнікі бізнесу.
Праграма семінара ўключае два блокі – тэарэтычны і практычны. Практычны блок прысвечаны яснай мове як інструменту інклюзіўнай камунікацыі. Да працы семінара можна падключыцца анлайн па спасылцы, указанай у праграме мерапрыемства ніжэй. Па выніках работы семінара будзе апублікаваны і размешчаны ў бібліятэцы БДУ электронны зборнік матэрыялаў.