26 верасня 2014 г. на базе кафедры міжнародных адносін БДУ быў праведзены міжнародны навукова-практычны семінар "Даследаванне міжнародных адносін у Рэспубліцы Беларусь: стан і перспектывы". У яго рабоце прынялі ўдзел выкладчыкі і аспіранты кафедры міжнародных адносін, а таксама супрацоўнікі Інстытута гісторыі НАН Беларусі.
Па традыцыі ўдзельнікі семінара сканцэнтравалі ўвагу на праблемах і перспектывах правядзення навуковых даследаванняў у галіне міжнародных адносін.
Работа семінара праходзіла ў рамках дзвюх навуковых секцый. На першай секцыі разглядаліся пытанні вывучэння і выкладання праблем міжнародных адносін у Рэспубліцы Беларусь у кантэксце асноўных тэндэнцый развіцця гуманітарных навук і адукацыйнага працэсу. На другой секцыі беларускія вучоныя-міжнароднікі ацанілі практычныя пытанні ажыццяўлення знешняй палітыкі Беларусі ў кантэксце трансфармацыі сучасных міжнародных адносін і канструявання еўразійскай прасторы ў новых умовах. У працы семінара прынялі ўдзел каля 20 чалавек, паведамленні зрабілі 17 чалавек.
Удзельнікі семінара заслухалі выступленні доктара гістарычных навук прафесара кафедры міжнародных адносін У.Е. Снапкоўскага, доктара палітычных навук, прафесара Ю.І. Малевіч, дацэнта кафедры міжнародных адносін Н.І. Дрозд, кандыдатаў гістарычных навук, дацэнтаў кафедры міжнародных адносін А.У. Дземідовіч, А.С. Жураўскай, І.І. Кавяка, С.А. Лашкевіча, А.У. Селіванава, А.У. Ціхамірава, І.А. Чувілава, кандыдата палітычных навук, выкладчыка кафедры міжнародных адносін К.І. Ярмашук, аспірантаў кафедры міжнародных адносін А.Д. Чарняк і Аажыглэ.
У рамках работы семінара была звернута ўвага на тое, што кафедра міжнародных адносін БДУ застаецца адным з вядучых навуковых цэнтраў па вывучэнні праблем міжнародных адносін у Рэспубліцы Беларусь. Прафесар У.Е. Снапкоўскі ацаніў вынікі дзейнасці кафедры міжнародных адносін за перыяд з 2002 па 2012 гг. (у фармаце другога дзесяцігоддзя яе дзейнасці). Прафесар Н.І. Дрозд прааналізавала сутнасць міжнароднай канфлікталогіі ў якасці напрамку тэорыі міжнародных адносін. У выступленнях А.С. Жураўскай і І.А. Чувілава былі ацэнены вынікі навуковай дзейнасці кафедры ў галіне вывучэння беларуска-іранскіх адносін і кітайскай ініцыятывы супольнасці адзінага лёсу чалавецтва. І.І. Кавяка прааналізавала асаблівасці вывучэння нямецкага нацыяналізму і нямецкай ідэнтычнасці ў дысертацыйных даследаваннях Вялікабрытаніі і ЗША ў 1990-я гг.
Вялікая ўвага ў рамках семінара была ўдзелена пытанням ажыццяўлення знешняй палітыкі Рэспублікі Беларусь на сучасным этапе. У выступленнях А.У. Ціхамірава, А.У. Дземідовіч і С.А. Лашкевіча было прааналізавана ўздзеянне глабальнага перафарматавання сучасных міжнародных адносін на знешнюю палітыку Рэспублікі Беларусь. Выступоўцы ацанілі ўплыў новай міжнароднай абстаноўкі на знешнюю палітыку Рэспублікі Беларусь і адлюстраванне новых падыходаў у важнейшых дактрынальных дакументах беларускай дзяржавы, звярнулі ўвагу на павышэнне значнасці новых фарматаў міжнароднага супрацоўніцтва ў асобе ШАС і БРІКС, адзначылі значнасць актывізацыі дыялогу Беларусі з дзяржавамі Азіі, Афрыкі і Лацінскай Амерыкі.
А.У. Селіванаў раскрыў асаблівасці дзейнасці ААН у Афрыцы па рашэнні праблемы змушанай міграцыі ў першым дзесяцігоддзі XXI ст. К.І. Ярмашук ацаніла новыя формы забеспячэння кібербяспекі Аўстраліі на сучасным этапе. А.Д. Чарняк асвятліла праблематыку пасярэдніцтва ва ўрэгуляванні тэрытарыяльнай спрэчкі паміж Венесуэлай і Гаянай. Аажыгэлэ даў ацэнку дзейнасці кітайскай дыяспары ў рэалізацыі ініцыятывы супольнасці адзінага лёсу чалавецтва.
Актыўны ўдзел у рабоце семінара прынялі вядучыя спецыялісты цэнтра ўсеагульнай гісторыі, міжнародных адносін і геапалітыкі Інстытута гісторыі НАН Беларусі. Галоўны навуковы супрацоўнік цэнтра, доктар гістарычных навук, прафесар А.А. Чалядзінскі асвятліў асноўныя вынікі даследаванняў адносін Беларусі з краінамі Лацінскай Амерыкі ў беларускай гістарыяграфіі. Загадчык цэнтра, кандыдат гістарычных навук, дацэнт І.В. Жылінская прааналізавала вынікі даследавання міжнародных культурных сувязей БССР міжваеннага перыяду, звярнуўшы ўвагу на тое, што многія праблемныя аспекты гэтага навуковага напрамку маюць патрэбу ў дадатковым вывучэнні, уключаючы збор першаснай інфармацыі. Вядучы навуковы супрацоўнік цэнтра, кандыдат гістарычных навук, дацэнт А.М. Бароўская асвятліла малавывучанае ў навуковым плане пытанне падрыхтоўкі савецка-польскіх чыгуначнай, консульскай і паштова-тэлеграфнай канвенцый у міжваенны перыяд. Старшы навуковы супрацоўнік цэнтра, доктар гістарычных навук, дацэнт А.А. Валодзькін падзяліўся вынікамі даследаванняў у галіне гістарыяграфіі адносін Беларусі з краінамі Афрыкі на поўдзень ад Сахары.
Выступоўцы звярнулі ўвагу на неабходнасць прадаўжэння паглыбленага даследавання праблем міжнародных адносін і знешняй палітыкі Беларусі, актывізацыі ўкаранення вынікаў навуковых даследаванняў у галіне міжнародных даследаванняў у адукацыйны працэс БДУ, пашырэння доступу беларускіх даследчыкаў да крыніц ўстаноў і прадпрыемстваў Рэспублікі Беларусь, павышэння эфектыўнасці навуковай дзейнасці беларускіх даследчыкаў у галіне міжнародных адносін.
Прапановы па арганізацыі навуковых даследаванняў у галіне міжнародных адносін і знешняй палітыкі Беларусі, якія прагучалі ў ходзе работы семінара, будуць адлюстраваны ў зборніку артыкулаў, які плануецца выдаць па выніках навуковага мерапрыемства.
 |
 |