14 чэрвеня 2024 г. прафсаюзнае бюро факультэта міжнародных адносін арганізавала экскурсію ва ўнікальны Музей грошай Нацыянальнага банка Рэспублікі Беларусь.
Экскурсанты пазнаёміліся са зборам рэдкіх экспанатаў, якія адлюстроўваюць гісторыю грашовага абарачэння на тэрыторыі Беларусі, гісторыю фінансавых устаноў і банкаўскай дзейнасці нашай краіны. Вялікую цікавасць выклікалі скарбы, знойдзеныя на нашых землях. Наведвальнікі пазнаёміліся з калекцыяй антычных манет, арабскімі куфічнымі дырхамамі, манетамі Залатой Арды, пражскімі грашыма, рускімі капейкамі, убачылі саліды, адчаканеныя на Брэсцкім манетным двары, срэбныя рублі і паўрубель перыяду НЭПа.
Наведвальнікі пазнаёміліся з гісторыяй станаўлення і развіцця Нацыянальнага банка Рэспублікі Беларусь як эмісійнага цэнтра, даведаліся аб працэсе стварэння наяўных грашовых знакаў нашай краіны, убачылі калекцыю рэдкіх памятных манет Рэспублікі Беларусь, якія атрымалі прызнанне ў міжнароднай нумізматычнай супольнасці за апошнія дзесяцігоддзі і з'яўляюцца сёння нумізматычнай каштоўнасцю.
Экскурсія дазволіла лепш даведацца пра гісторыю грашовага абарачэння на тэрыторыі Беларусі, выклікала станоўчыя эмоцыі і жаданне ўдзельнічаць у такіх пазнавальных мерапрыемствах.
