Кафедра міжнароднага турызму факультэта міжнародных адносін Беларускага дзяржаўнага ўніверсітэта сумесна з Нацыянальным агенцтвам па турызме 26.04.2024 г. правяла I Турнір «Мая будучая прафесія ў сферы турызму і гасціннасці» для навучэнцаў 9-10 класаў сярэдніх школ і гімназій г. Мінска. Асноўная мэта мерапрыемства – знаёмства старшакласнікаў са спецыяльнасцю "Менеджмент у сферы міжнароднага турызму і гасціннасці", прыцягненне абітурыентаў, падтрымка таленавітай моладзі.
У фінальным этапе турніру прынялі ўдзел школьнікі ДУА "Школа 201 г. Мінска", навучэнцы Гімназіі №2 і Гімназіі №19 г. Мінска.
З прывітальным словам Турнір адкрыла дэкан факультэта міжнародных адносін дацэнт А. А. Дастанка. Журы турніру ўзначалілі загадчык кафедры міжнароднага турызму прафесар Л. М. Гайдукевіч і намеснік дырэктара Нацыянальнага агенцтва па турызме А.М. Вашчынчук. Актыўны ўдзел у арганізацыі турніру і рабоце журы прынялі прадстаўнікі прафесарска-выкладчыцкага складу кафедры міжнароднага турызму – дацэнт Н.М. Барысенка і старшы выкладчык А.М. Рашэтнікава.
Турнір уключаў 3 этапы, у тым ліку абарону камандных праектаў-прэзентацый "Турысцкі буклет: 5 прычын наведаць наш раён"; квэст-гульню «Інклюзіўны турызм», арганізаваную студэнцкай навукова-даследчай лабараторыяй «Інавацыі ў турызме»; камандную віктарыну "Турысцка-рэкрэацыйныя рэсурсы Рэспублікі Беларусь і іх выкарыстанне ў міжнародным турызме", дзе школьнікі паказалі высокі ўзровень ведаў рэгіянальных асаблівасцей турысцкага патэнцыялу Беларусі.
У рамках Турніру для будучых абітурыентаў была арганізавана экскурсія па факультэце міжнародных адносін БДУ, "круглы стол" са студэнтамі спецыяльнасці "Менеджмент у сферы міжнароднага турызму і гасціннасці", экскурсія ў Музей гісторыі БДУ.
Пераможцам турніру стала каманда ДУА "Школа 201 г. Мінска", усе ўдзельнікі турніру атрымалі сертыфікаты і памятныя падарункі.
Кафедра міжнароднага турызму выказвае падзяку ўсім удзельнікам і арганізатарам мерапрыемства.
{gallery}2024/2024_04_26_04{/gallery}