У пачатку сакавіка для студэнтаў першага курса спецыяльнасці «Міжнароднае права», якія вывучаюць англійскую мову ў якасці другой замежнай, быў арганізаваны майстар-клас з удзелам другакурсніка Арцёма Куцэнкі, які таксама з'яўляецца галоўным студэнцкім куратарам дадзенай спецыяльнасці. Мерапрыемства галоўным чынам было накіравана на папулярызацыю студэнцкай навукова-даследчай работы на англійскай мове. Такая форма арганізацыі вучэбнай дзейнасці адносіцца да сістэмы ўзаемнага навучання ў асяроддзі аднагодкаў (peer education) і дазваляе ўнесці разнастайнасць у педагагічны працэс.
У ходзе майстар-класа студэнт расказаў аб уласным вопыце ўдзелу ў розных формах навукова-даследчай работы на англійскай мове: секцыі "Актуальныя пытанні міжнародных адносін і міжнароднага права ў медыйнай прасторы" (у рамках 80-й канферэнцыі студэнтаў і аспірантаў БДУ), у Міжнародным конкурсе эсэ Erudite, у дзейнасці гуртка аратарскага майстэрства і дэбатаў Debate on FIRe і ў іншых навуковых мерапрыемствах, якія арганізуюцца пры садзейнічанні кафедры англійскай мовы міжнароднай прафесійнай дзейнасці.
Студэнт прадставіў адну са сваіх прэзентацый мінулага года па тэме "Frivolous lawsuits in the mass media coverage" ("Неабгрунтаваныя іскі ў асвятленні СМІ"). У сваім дакладзе Арцём Куцэнка расказаў пра найбольш вядомыя іскі, якія былі звязаны са злоўжываннем працэсуальнымі правамі і атрымалі шырокую агалоску ў сродках масавай інфармацыі (навуковы кіраўнік – старшы выкладчык кафедры англійскай мовы міжнароднай прафесійнай дзейнасці, магістр міжкультурнай камунікацыі С.У. Салаўёва). Дакладчык падкрэсліў важнасць выкарыстання дакладных крыніц інфармацыі, паколькі асобныя дэталі іскаў могуць быць моцна перабольшаны папулярнымі СМІ, у чым ён змог асабіста пераканацца ў працэсе падрыхтоўкі сваіх тэзісаў.
Пасля заканчэння выступлення Арцём Куцэнка адказаў на пытанні. Яны галоўным чынам тычыліся часовых затрат на падрыхтоўку да канферэнцыі, праблемы адбору надзейных крыніц інфармацыі, публікацыйных магчымасцей і пераваг удзелу ў навукова-даследчай рабоце.
Студэнты першага курса адзначылі, што дакладчык упэўнена валодае прафесійнай лексікай на англійскай мове па тэме “Crime and punishment” (“Злачынства і пакаранне”) і валодае развітымі ўменнямі публічнага выступу. Па водгуках студэнтаў, майстар-клас аказаўся для іх карысным.
«Падчас майстар-класа я вынесла для сябе шмат карысных ведаў, якія я змагу прымяніць у паўсядзённым жыцці. Аратар быў дастаткова зацікаўлены ва ўзаемадзеянні з аўдыторыяй і змог правільна і зразумела данесці патрэбную інфармацыю». (Марыя Гладышава, студэнтка 1-га курса спецыяльнасці "Міжнароднае права")
«Выступ Арцёма Куцэнкі падштурхнуў мяне да больш падрабязнага вывучэння прадстаўленай тэмы! Я быў уражаны слоўнікавым запасам свайго куратара, бо ён багаты на спецыфічныя юрыдычныя тэрміны!» (Глеб Чорны, студэнт 1-га курса спецыяльнасці "Міжнароднае права")
«Я з упэўненасцю магу сказаць, што такі досвед для першакурснікаў сапраўды неабходны. Для мяне, студэнта першага курса, у свой час было неймаверна цяжка самастойна разбірацца ва ўсіх тонкасцях напісання навуковых прац і ўдзелу ў адпаведных навуковых канферэнцыях. Таму я быў рады падзяліцца набытым досведам. Асобную падзяку за магчымасць выступіць у рамках метаду peer education я б хацеў выказаць свайму выкладчыку і навуковаму кіраўніку С.У. Салаўёвай!» (Арцём Куцэнка, студэнт 2-га курса спецыяльнасці "Міжнароднае права")
Будзем спадзявацца, што мерапрыемства будзе садзейнічаць далейшаму росту цікавасці студэнтаў-першакурснікаў да навукова-даследчай работы на англійскай мове і пацягне за сабой павышэнне іх публікацыйнай актыўнасці на якасна новым узроўні!
 |
 |