Старшы выкладчык кафедры міжнародных эканамічных адносін ФМА БДУ Анастасія Кісялевіч увайшла ў лік лепшых маладых вучоных 2023 года ў СНД. Яна ўдастоена дыплома I ступені і нагруднага знака за перамогу ў конкурсе "Лепшы малады вучоны СНД".
Анастасія Кісялевіч прадставіла даследаванне "Рынак інтэлектуальнай уласнасці ЕАЭС: сучасны стан і прыярытэты развіцця" ў катэгорыі "Эканамічныя навукі". Праца прысвечана аналізу рынку інтэлектуальнай уласнасці (ІУ) ЕАЭС як важнага фактара сацыяльна-эканамічнага развіцця краіны. У даследаванні разгледжаны сусветныя тэндэнцыі і асаблівасці развіцця гэтай галіны, асноўныя колькасныя паказчыкі патэнтнай актыўнасці розных краін у дынаміцы за пяць гадоў. Таксама даследчык распрацавала шэраг захадаў з улікам прыярытэтаў развіцця рынку ІУ у ЕАЭС.
Праца Анастасіі Кісялевіч увойдзе ў зборнік навуковых артыкулаў “VIII Міжнароднае кніжнае выданне краін СНД “Лепшы малады вучоны – 2023” з прысваеннем міжнароднага кода ISBN.
Арганізатарамі навуковага спаборніцтва выступілі Міжнародная асацыяцыя студэнтаў і асацыяцыя "Агульнанацыянальны рух "Бобек" (Казахстан).
Даведка.
Конкурс "Лепшы малады вучоны СНД" штогод праводзіцца ў г. Астана (Казахстан). Прыняць у ім удзел могуць даследчыкі з краін СНД ва ўзросце да 35 гадоў. Міжнародная камісія адбірае 100 лепшых работ у гуманітарных і прыродазнаўчых галінах навукі, аўтары якіх атрымліваюць дыплом і нагрудны знак "Лепшы малады вучоны". Конкурс накіраваны на выяўленне найбольш значных інавацыйных праектаў маладых вучоных, прасоўванне навуковых інтарэсаў, стварэнне аб'яднаўчай платформы для развіцця навукі ў краінах СНД.