24 кастрычніка на кафедры англійскай мовы міжнароднай прафесійнай дзейнасці ФМА БДУ паспяхова прайшлі штогадовыя Дыпламатычныя чытанні, арганізаваныя для студэнтаў 2-га курса спецыяльнасці "Мытная справа". У межах абранай для мерапрыемства тэмы “Wonders of my country” студэнты падрыхтавалі групавыя выступы. Кожная група прадставіла прэзентацыю аб дасягненнях архітэктуры (старадаўніх і сучасных) і інжынерных канструкцыях сваёй краіны. Падрыхтоўка да мерапрыемства прайшла пад кіраўніцтвам старшых выкладчыкаў кафедры Майсюк Ю. Л., Жукавец А. С.
Падчас падрыхтоўкі да Дыпламатычных чытанняў студэнты азнаёміліся з вялікай колькасцю інфармацыі і змаглі ўдасканаліць свае навыкі каманднай працы на англійскай мове, таму што толькі згуртаваная каманда можа стварыць нешта па-сапраўднаму цікавае і дзіўнае.
Першымі свой праект прадставілі Васюкевіч В. М. і Драпеза В.У. Студэнты выступілі з тэмай “Catholic cathedral of Saint Francis Xavier in Grodno”. Студэнты расказалі пра гісторыю стварэння сабора, а таксама пра інтэр'ер і экстэр'ер гэтага цудоўнага цэнтра каталіцкага жыцця Гродна. Прэзентацыю па тэме “Nesvizh Castle” падрыхтавалі студэнткі 13 групы Сідунова М. Г. і Сінюковіч К. У. Апроч гісторыі гэтага цудоўнага нацыянальна-культурнага музея-запаведніка дзяўчыны таксама асвятлілі легенды, звязаныя з гэтым месцам. Праташчык К. А. і Капыток В. Д. прадставілі на нашым мерапрыемстве тэму “Mir Castle”. Было цікава паслухаць пра адну з самых галоўных турыстычных славутасцяў Рэспублікі Беларусь, якая прываблівае тысячы турыстаў з усяго свету. Працягнулі прадстаўляць дасягненні архітэктуры Рэспублікі Беларусь студэнткі 14 групы Партнова А. А. і Дрыгель А. А. са сваёй тэмай “Gomel Palace and Park Ensemble”. Гэта адна са старэйшых музейных устаноў Рэспублікі Беларусь. Будынкі ўстановы з'яўляюцца помнікамі архітэктуры XVIII-XIX ст. і ўключаны ў Дзяржаўны спіс гісторыка-культурных каштоўнасцей, якія ахоўваюцца дзяржавай. Паведамленне “Brest Fortress” пра гістарычны помнік, які стаў сімвалам гераізму і мужнасці савецкіх воінаў падчас Вялікай Айчыннай вайны падрыхтавалі Юркевіч Д. В. і Чэрнік У. Д. Прэзентацыю на тэму “National Library of Belarus” прадставілі Даўгірдайце М. С. і Спрынчак В. А. Заснаваная ў 1922 годзе бібліятэка ўжо больш за стагоддзе з'яўляецца апорай для ўсіх, хто імкнецца здабыць веды і пашырыць свой кругагляд.
Завяршыла мерапрыемства Насірава Д. выступам на тэму “Basilica Cistern”. Студэнтка расказала аб унікальнай музейнай прасторы, якая размешчана ў яе родным горадзе Стамбуле. Цыстэрна Базіліка – падземнае вадасховішча, пераўтворанае ў вялізны арт-аб'ект. Яно дзівіць сваімі маштабамі і незямной прыгажосцю.
Праслухаўшы ўсе паведамленні, студэнты атрымалі вельмі важны вопыт выступлення на публіцы, развілі практычныя навыкі аратарскага мастацтва і ўдасканалілі веданне англійскай мовы, пазнаёміліся з самымі цудоўнымі славутасцямі Беларусі і Турцыі. Абмеркаваўшы ўсе выступленні, мы прыйшлі да высновы, што наша краіна поўная ўнікальных і цудоўных збудаванняў, якія заслугоўваюць вялікай увагі нашага народа. Ахова такіх дзіўных збудаванняў – абавязковая ўмова ўстойлівага развіцця дзяржавы, умацавання яе прэстыжу ў міжнароднай супольнасці. Я лічу, што неабходна больш расказваць пра такія месцы, наведваць іх, таму што гэта садзейнічае фарміраванню нацыянальнай самаідэнтыфікацыі, выклікае пачуццё гонару за сваю краіну. Дзякуючы актыўнасці дзяржавы за апошнія гады павялічылася прысутнасць беларускіх аб'ектаў у спісах Сусветнай спадчыны ЮНЕСКА. Адказныя адносіны Рэспублікі Беларусь па захаванні сваёй спадчыны высока ацэнены міжнароднай грамадскасцю, што пацверджана статусам ЮНЕСКА.
Партнова Алена, студэнтка 2 курса спецыяльнасці "Мытная справа"
{gallery}2023/2023_10_24{/gallery}