18 кастрычніка ў Беларускім таварыстве дружбы і культурнай сувязі з замежнымі краінамі прайшло мерапрыемства "Фідэль, салдат ідэй", прысвечанае кубінскаму рэвалюцыянеру, дзяржаўнаму, палітычнаму і партыйнаму дзеячу, які кіраваў Кубай з 1959 па 2008 г., Фідэлю Кастра. Арганізатарамі гэтай падзеі выступілі загадчык кафедры рамана-германскіх моў міжнароднай прафесійнай дзейнасці В. У. Сідарэвіч-Стахнова і старшы выкладчык кафедры Ю. І. Сіняўская. Актыўны ўдзел у мерапрыемстве прынялі студэнты факультэта міжнародных адносін спецыяльнасцей "Міжнародныя адносіны", "Міжнароднае права", "Сусветная эканоміка", "Мытная справа", якія вывучаюць іспанскую мову.

Падзея сабрала студэнтаў і выкладчыкаў розных ВНУ (БДУ, МДЛУ, Акадэміі кіравання пры Прэзідэнце Рэспублікі Беларусь), членаў таварыства дружбы "Беларусь - Куба" і ўсіх, хто цікавіцца гісторыяй Кубы і асобай Фідэля Кастра, даражыць добрымі адносінамі паміж дзвюма краінамі.

Мерапрыемства праходзіла ў сяброўскай атмасферы: асвятлялася біяграфія Фідэля Кастра, гучалі песні ў выкананні студэнтаў, дэкламаваліся вершы на іспанскай мове. Фіналам стала песня "Yo soy cubano" у выкананні Мікіты Уласенка, студэнта 2 курса спецыяльнасці "Мытная справа". Вядучымі мерапрыемства былі Аляксандр Строчкоў і Луіза Костка, студэнты 3 курса спецыяльнасці "Міжнароднае права".