20 мая 2022 года ў рамках клуба навуковых дыскусій (кіраўнік – загадчык кафедры англійскай мовы міжнароднай прафесійнай дзейнасці Дубінко С. А.) пры ўдзеле старшых выкладчыкаў Маравой Л. А. і Кузьміной-Мамедавай А. С. была арганізавана сустрэча-дыскусія на англійскай мове з магістранткай спецыяльнасці «Сусветная эканоміка» Ангелінай Ляўковіч. Мерапрыемства праводзілася для студэнтаў 2 курса спецыяльнасці «Сусветная эканоміка» (англійская мова як першая замежная мова).
У цяперашні час Ангеліна з'яўляецца начальнікам аддзела Агенцтва ЗЭД па рабоце з краінамі Азіі ў ААТ "Банк развіцця Рэспублікі Беларусь" і заснавальніцай турыстычнай фірмы "Pineapple tours".
Сустрэчу адкрыла Дубінка Святлана Аляксееўна, якая прадставіла студэнтам спікера, а таксама агучыла пытанні, вынесеныя для абмеркавання ў межах дадзенага мерапрыемства. Была пазначана наступная тэматыка: "Application of leader's tools in strategic business management and how to start a new business project". Акрамя прэзентацыі шэрагу прыёмаў стратэгічнага кіравання, разваг аб якасцях бізнес-лідара, важны акцэнт у заяўленых тэмах быў зроблены на ролі жанчыны ў сучаснай бізнес-сферы, у тым ліку на магчымых перашкодах у яе прафесійнай кар'еры. Досведам фармавання свайго шляху і падзялілася Ангеліна Ляўковіч.
Магістрантка расказала студэнтам ФМА аб сваёй насычанай і рознабаковай адукацыі: Ангеліна скончыла Лонданскі гарадскі ўніверсітэт у 2018 годзе, а пасля працягнула сваё навучанне ўжо ў Беларусі на факультэце журналістыкі БДУ, падкрэсліўшы важнасць павышэння камунікатыўных навыкаў і развіцця сябе як асобы ў розных аспектах жыцця. На гэтым яе шлях у БДУ не скончыўся: на дадзены момант Ангеліна вучыцца ў магістратуры факультэта міжнародных адносін на спецыяльнасці "Сусветная эканоміка".
Аўдыторыя была зацікаўлена колькасцю пройдзеных Ангелінай ступеняў адукацыі, што стымулявала ажыўленую дыскусію на прадмет неабходнасці вывучэння розных прафесійных сфер для станаўлення сябе як будучага спецыяліста і ў цэлым для асобаснай самарэалізацыі. Акрамя таго, спікер падзялілася нестандартнымі практыка-арыентаванымі і таму карыснымі парадамі для тых, хто плануе ствараць уласны бізнес.
Лізавета Краскоўская і Кірыл Майсяенка, студэнты 2 курса спецыяльнасці "Сусветная эканоміка"
