13 мая па запрашэнні факультэта фізічнага выхавання і турызму сумесна з кафедрай замежных моў факультэта замежных моў Брэсцкага дзяржаўнага ўніверсітэта ім. А.С. Пушкіна група студэнтаў першага і другога курсаў спецыяльнасцяў «Міжнародныя адносіны», «Мытная справа», «Лінгвакраіназнаўства», «Менеджмент у сферы міжнароднага турызму» ФМА пад кіраўніцтвам ст. выкладчыкаў кафедры рамана-германскіх моў міжнароднай прафесійнай дзейнасці Т.С. Шарупіч, Ю.І. Сіняўскай, А.У. Белазёравай наведалі горад Брэст у рамках правядзення мерапрыемстваў Года гістарычнай памяці.
Наведванне Мемарыяльнага комплексу "Брэсцкая крэпасць-герой" стала кульмінацыйным пунктам маршруту ў праграме.
Мемарыяльны комплекс "Брэсцкая крэпасць-герой" з'яўляецца адным з найбольш вядомых і наведвальных турыстычных аб'ектаў Рэспублікі Беларусь. Тут у адзіным комплексе аб'яднаны месцы баёў, руіны, збудаванні крэпасці і музейныя экспазіцыі. "Брэсцкая крэпасць-герой" — унікальнае фартыфікацыйнае збудаванне, важнейшы помнік Другой сусветнай вайны, сімвал гераічнага супраціўлення і выдатнай мужнасці яе абаронцаў.
Для студэнтаў і выкладчыкаў ФМА былі арганізаваны 2 экскурсіі: па Музеі абароны Брэсцкай крэпасці і аглядная экскурсія па тэрыторыі мемарыяла. Праводзіла іх Іна Віктараўна Кавальчук, загадчык навукова-асветнага аддзела ДУ “Мемарыяльны комплекс “Брэсцкая крэпасць-герой”.
Асаблівую цікавасць у вучняў выклікаў Музей абароны Брэсцкай крэпасці, размешчаны ў адноўленай частцы абарончай казармы Цытадэлі. Сёння экспазіцыйная плошча музея складае 1270 м2. Экспазіцыя перабудоўвалася ў 1975, 1994 – 2008 гадах, прысвечана гісторыі крэпасці. Адмысловая ўвага нададзена падзеям абароны ў чэрвені – ліпені 1941 г. і лёсам яе абаронцаў. За гады існавання музей наведала каля 25 млн. чалавек са 140 краін свету. У 10 залах музея прадстаўлена каля 4 тыс. экспанатаў, якія знаёмяць з гісторыяй будаўніцтва крэпасці, падзеямі Першай сусветнай вайны (1914–1918), гісторыяй горада і крэпасці ў складзе Польшчы (1921–1939), гераізмам і мужнасцю ўдзельнікаў абароны Брэсцкай крэпасці ў чэрвені – ліпені 1941 года.
Архітэктурна-скульптурны ансамбль мемарыяла ўключае галоўны манумент "Мужнасць", штык-абеліск, скульптурную кампазіцыю "Смага", плошчу Цырыманіялаў, 3 рады мемарыяльных пліт з пахаваннямі загінуўшых, руіны і ацалелыя збудаванні крэпасці, музей. Таксама на тэрыторыі крэпасці знаходзяцца гарнізонны храм свяціцеля Мікалая Цудатворца, руіны будынка кальцавой казармы, Холмскія вароты (на поўдні цытадэлі), Цярэспальскія вароты (на паўднёвым захадзе цытадэлі), Паўночныя або Аляксандраўскія (на поўначы Кобрынскага ўмацавання), Паўночна-заходнія (на поўнач -захадзе Кобрынскага ўмацавання) і Паўднёвыя (на поўдні Валынскага ўмацавання, Шпітальны востраў).
Варта адзначыць, што арганізацыя такіх мерапрыемстваў садзейнічае фарміраванню патрыятычнага выхавання студэнтаў, як аднаго з галоўных прыярытэтаў у рабоце сістэмы адукацыі.
Ю.І. Сіняўская, ст. выкладчык кафедры рамана-германскіх моў міжнароднай прафесійнай дзейнасці
{gallery}2022/2022_05_13_02{/gallery}