На факультэце міжнародных адносін Беларускага дзяржаўнага ўніверсітэта прайшоў міжнародны анлайн семінар па экатурызме. Ідэя рэалізавана ў рамках расійскага праекта «Экалагічная асвета і экатурызм на асабліва ахоўных прыродных тэрыторыях. Інструментарый для арганізацыі ўзаемадзеяння спецыялістаў ААПТ і сельскіх жыхароў у мэтах развіцця экалагічнага турызму ў рэгіёнах Расіі». У мерапрыемстве прынялі ўдзел замежныя, беларускія і расійскія эксперты, прадстаўнікі грамадскіх аб'яднанняў, а таксама гаспадары аграэкасядзіб.
«У свеце і ў Беларусі ўсё большую папулярнасць набірае турызм з мінімальным уздзеяннем на прыроду, – адзначыла старшыня праўлення грамадскага аб'яднання «Адпачынак у вёсцы» Валерыя Кліцунова. – Пры гэтым, калі казаць аб нашай краіне, адпаведная інфраструктура ствараецца не толькі ў такіх буйных аб'ектах як нацыянальныя паркі і запаведнікі, але і ў аграсядзібах, гэта значыць з уцягваннем мясцовага насельніцтва. У якасці станоўчых прыкладаў можна назваць аграсядзібу «За масточкам» у Валожынскім раёне, дзе практыкуюцца водныя паходы на каяках з бердвочынгам. А ў сядзібе "Фальварак "Лазенькі" ў Магілёўскім раёне праводзяць тэматычныя пазнавальныя экскурсіі па экасцежцы "Там, на невядомых дарожках" з наведваннем мясцовых помнікаў прыроды, знаёмствам з мясцовай флорай і фаунай праз цікавыя гісторыі».
У ліку актуальных задач, якія трэба будзе вырашаць у бліжэйшай перспектыве ў сферы экалагічнага турызму, экспертамі ў час семінара былі названы ўдасканаленне заканадаўчай базы, павышэнне ўзроўню экалагічнай культуры насельніцтва, развіццё сэрвісу, падрыхтоўка кваліфікаваных кадраў, узаемадзеянне з мясцовымі супольнасцямі і бізнесам, стварэнне спрыяльнага клімату для інвестараў і іншыя.
Яскравым прыкладам станоўчага ўзаемадзеяння з мясцовай супольнасцю стала прэзентацыя вопыту стварэння і развіцця запаведніка дзікай прыроды Тадоба Андхары ў Індыі. Тут цяпер дзейнічае 21 сафары-парк, турыстам прапануецца 12 відаў розных забаў, а атрыманыя ад наведвальнікаў грошы накіроўваюцца ў мясцовы бюджэт і выкарыстоўваюцца ў тым ліку для развіцця інфраструктуры запаведніка. Дзякуючы правільнаму гаспадаранню і асветніцкай дзейнасці колькасць бенгальскіх тыграў на асабліва ахоўнай прыроднай тэрыторыі вырасла з 250 да 350, калі па краіне гэтая лічба складае каля 2,5 тысяч асобін.
Пад час семінара былі таксама разгледжаны лепшыя еўрапейскія і беларускія практыкі ўзаемадзеяння з мясцовым насельніцтвам у галіне экатурызму, а таксама правальныя кейсы па экатурызме.
Сёння расійская дэлегацыя знаёміцца са станоўчым беларускім вопытам па развіццю экатурызму і формамі ўзаемадзеяння з мясцовым насельніцтвам у Мінскай вобласці. "Мы маем намер развіваць супрацоўніцтва з аўтарытэтным расійскім ЭкаЦэнтрам "Запаведнікі" перш за ўсё ў плане асветніцкай работы, і плануем ужо ў гэтым годзе распрацаваць тэматычныя інтэрпрэтацыйныя экапраграмы для дарослых і дзяцей", – расказала Валерыя Кліцунова.
Крыніца
Больш інфармацыі аб семінары
