Да 100-годдзя найстарэйшага і аднаго з лідараў беларускай мытнай сістэмы – Мінскай рэгіянальнай мытні загадчыкам кафедры мытнай справы прафесарам В. А. Астрогам ў сааўтарстве з начальнікам мытні С. В. Івановым была падрыхтавана і выдадзена ўнікальная манаграфія "Гісторыя Мінскай рэгіянальнай мытні".
Даследаванне было праведзена на аснове фондаў Нацыянальнага архіва Рэспублікі Беларусь і архіва Мінскай рэгіянальнай мытні (МРМ). Сярод усіх сталічных мытняў, менавіта МРМ з'яўляецца спадкаемніцай слаўных традыцый Мінскай мытні, якая існавала яшчэ з XI ст. Адмысловая ўвага ў кнізе нададзена дзейнасці мытні ў 1922-1991 гг. і яе станаўленні як рэгіянальнай з 1992 г. Падрабязна разгледжаны вынікі работы сталічнай мытні ў сферы рэгулявання знешнеэканамічнай дзейнасці і забеспячэння эканамічнай бяспекі на сучасным этапе. Кніга змяшчае ўнікальныя гістарычныя фатаграфіі, перададзеныя ветэранамі мытнай службы. У дадатку да яе дадзена храналогія найважнейшых падзей яе гісторыі, прадстаўлены адноўленыя імёны многіх яе кіраўнікоў, пачынаючы з канца XV стагоддзя. Асобнік кнігі перададзены ў бібліятэку ФМА.
