На кафедры англійскай мовы эканамічных спецыяльнасцяў адбылося штогадовае мерапрыемства — «Дыпламатычныя чытанні 2020». Мерапрыемства было арганізавана студэнтамі другога курса спецыяльнасці "Менеджмент (у сферы міжнароднага турызму)" пад кіраўніцтвам старэйшых выкладчыкаў Д. І. Катковай, Г. І. Ахрымені, Н. І. Чарнецкай на тэму «Management strategies».
Дыпламатычныя чытанні прайшлі дынамічна і вельмі цікава! Выкладчыкі кантралявалі час дакладаў і прэзентацый (да 10 хвілін на ўдзельніка), а таксама падтрымлівалі ўдзельнікаў апладысментамі.
Выступы мелі як тэарэтычны, так і практычны характар. У пачатку выступленняў Стралецкая Кацярына пазнаёміла ўсіх удзельнікаў з паняццем стратэгічнага менеджменту – гэта пастаяннае планаванне, маніторынг, аналіз і ацэнка ўсяго, што неабходна арганізацыі для дасягнення яе мэт і задач. З яго дапамогай арганізацыі могуць атрымаць канкурэнтныя перавагі, павялічыць долю на рынку і спланаваць сваю будучыню.
Высоцкая Надзея, Жукоўская Паліна, Кавальчык Кацярына, Няборская Аліна, Сасноўская Яніна, Шаройкіна Аляксандра і Яшына Лізавета прадставілі асноўныя тыпы, з якіх складаецца стратэгічны менеджмент. Тыпы стратэгій могуць адрознівацца ў рэалізацыі ў залежнасці ад навакольнага асяроддзя. У ходзе прэзентацый і актыўных абмеркаванняў былі разгледжаны мэты, асаблівасці і перавагі канкурэнтнай стратэгіі (competitive strategy), карпаратыўнай стратэгіі (corporate strategy), стратэгіі бізнес-узроўню (business strategy), функцыянальнай стратэгіі (functional strategy), аперацыйнай стратэгіі (operating strategy).
Напрыканцы былі пералічаны асноўныя тэндэнцыі ў лідарстве і стратэгічным менеджменце як у цяперашні час, так і ў бліжэйшай будучыні. Удзельнікі зрабілі выснову, што складанасць росту бізнесу прыводзіць да супрацоўніцтва. На сённяшні дзень усе больш кіраўнікоў выкарыстоўваюць якасны аналіз дадзеных, каб дамагчыся станоўчых зменаў. Яшчэ адной важнай тэндэнцыяй на бліжэйшыя гады стане рашэнне праблем з улікам кантэксту. Знешняе асяроддзе можа ствараць сітуацыі, якія могуць запатрабаваць адаптацыі ўнутранага асяроддзя бізнесу. Сёння лідары ўлічваюць гэтую неабходнасць і надаюць вялікую ўвагу ўсёй бізнес-экасістэме.
Яшына Лізавета, студэнтка 2 курса спецыяльнасці "Менеджмент (у сферы міжнароднага турызму)"
Д. І. Каткова, старшы выкладчык кафедры англійскай мовы эканамічных спецыяльнасцяў
