15 кастрычніка 2020 года на нашым факультэце прайшла інтэлектуальная гульня «ШТО? ДЗЕ? КАЛІ?». Арганізатарам гульні выступіў Студэнцкі Савет па якасці адукацыі. У мерапрыемстве ўзялі ўдзел студэнты ФМА розных спецыяльнасцяў і курсаў. Усяго больш чым сто студэнтаў і 21 каманда. Удзельнікі прадэманстравалі выдатную эрудыцыю, свае рознабаковыя шырокія веды, а таксама ў чарговы раз даказалі, што на факультэце міжнародных адносін вучацца адны з самых разумных студэнтаў Беларусі.
Гульня пачалася з вітальнага слова намесніка дэкана па навуковай рабоце Алены Вітальеўны Пільгун. Алена Вітальеўна павіншавала ўдзельнікаў «ШТО? ДЗЕ? КАЛІ?» з адкрыццём восеньскага сезону інтэлектуальнай гульні, а таксама падзякавала Студэнцкаму Савету па якасці адукацыі за магчымасць правядзення такіх мерапрыемстваў. Завяршылася гульня прывітаннем намесніка дэкана па вучэбнай і выхаваўчай рабоце Сяргея Валер'евіча Карэліна, які адзначыў важнасць сувязі пакаленняў, студэнтаў і выкладчыкаў. Сяргей Валер'евіч уручыў дыпломы II, III ступені прызёрам гульні, а таксама дыплом I ступені і кубак ФМА «ШТО? ДЗЕ? КАЛІ?» камандзе-пераможцу.
Па выніку гульні 3 месца заняла каманда «Пайсці па-беларуску» (ваенная кафедра, спецыяльнасць "Міжнародныя адносіны"), 2 месца ў каманды «Соре, мы з ЛСВ» (Спецыяльнасць «Лінгвакраіназнаўства»). Пераможцам ж стала каманда «Паедзем пасядзім» (спецыяльнасць "Міжнародныя адносіны").
