У пятніцу 4 верасня студэнты-першакурснікі спецыяльнасці "Міжнародныя адносіны" пачалі сваё знаёмства з курсам «Гісторыя міжнародных адносін», з якім наша студэнцкае жыццё будзе цесна звязана на працягу першых двух гадоў вучобы. Па словах нашага лектара Віктара Генадзьевіча Шадурскага, без глыбокага ведання гісторыі мы не зразумеем сучаснасці і наўрад ці зможам прагназаваць будучыню.
Знаёмства з курсам прафесар вырашыў пачаць праз праверку нашых школьных ведаў гісторыі, выкарыстоўваючы партал Kahoot. Гэты партал дазваляе ствараць і праводзіць адукацыйныя тэсты, гульні і віктарыны для 50 удзельнікаў.
Пасля праходжання тэстаў (15 пытанняў) 6 пераможцаў, якіх вызначыў камп'ютар, атрымалі прызы ў выглядзе навучальных дапаможнікаў за подпісам самога дэкана факультэта. Нас, хто атрымаў прыз, папрасілі таксама коратка расказаць пра сябе.
Наша лекцыя праходзіла ў вельмі актыўнай форме. Гэта быў не маналог, а дыскусія па шматлікіх пытаннях. Студэнты задавалі пытанні, выказвалі сваю думку. Як нам здалося, выкладчык усё вельмі ўважліва слухаў, задаваў удакладняючыя пытанні, падбадзёрваў.
Будзем чакаць наступных пар і спадзяемся, што гэта будзе не сухое завучванне тых ці іншых аспектаў гісторыі міжнародных адносін, а творчае супрацоўніцтва выкладчыка і студэнтаў.
Іван Розум, студэнт 1 курса спецыяльнасці "Міжнародныя адносіны"
{gallery}2020/2020_09_04{/gallery}