30 красавіка 2020 года, напярэдадні нацыянальнага свята ў Польшчы -— Дня Канстытуцыі 3 мая (Święto Konstytucji 3 Maja), прысвечанага 229 гадавіне прыняцця канстытуцыі, адбылася відэаканферэнцыя студэнтаў і выкладчыкаў факультэта міжнародных адносін з Надзвычайным і Паўнамоцным Паслом Рэспублікі Польшча ў Рэспубліцы Беларусь Артурам Міхальскім.
Асноўнай тэмай відэаканферэнцыі стала значэнне Канстытуцыі 3 мая 1791 г., прынятай Чатырохгадовым сеймам (саслоўна-прадстаўнічым органам Рэчы Паспалітай) не толькі для дзяржавы, але і для народа. Прыняцце Канстытуцыі 3 мая 1791 года стала галоўным дасягненнем Сейма. Прэамбула Канстытуцыі і яе артыкулы грунтаваліся на прынцыпах народнага суверэнітэту, які ў дадзеным выпадку быў выкарыстаны і ў дачыненні да шляхты і да гараджан, што дазволіла размеркаваць уладу больш раўнамерна. Канстытуцыя 3 мая стала першай канстытуцыяй ў Еўропе і другой, пасля ЗША, у свеце, паўплывала на дух народа, дала сілу перажыць цяжкія часы, нягледзячы на тое, што дзейнічала невялікі прамежак часу. Канстытуцыя 3 мая — сімвал развіцця Польшчы, вялікі здабытак, спадчына народа і гэтым варта ганарыцца. Пасля выступлення па тэме спадар Артур Міхальскі адказаў на шматлікія пытанні ўдзельнікаў, якія тычаліся як самой праблемы відэаканферэнцыі, так і польска-беларускіх адносін на сучасным этапе.
Хочам выказаць падзяку пану Артуру Міхальскаму за ўжо чацвёртую па ліку анлайн-сустрэчу, праведзеную ў красавіку 2020 г., за цікавую і карысную інфармацыю!
Крысціна Сідарчук, 2 курс спецыяльнасць «Мытная справа»
{gallery}2020/2020_04_30{/gallery}