77-я красавіцкая навуковая канферэнцыя на факультэце міжнародных адносін ўпершыню прайшла ў незвычайным і нязвыклым фармаце. Нягледзячы на сітуацыю, якая склалася не толькі ў нашай краіне, але і ва ўсім свеце, нашы ніколі не падаючыя духам выкладчыкі і студэнты праявілі энтузіязм, вынаходлівасць і адкрытасць да новых выклікаў у галіне камп'ютарных інфармацыйных тэхналогій. Skype, Moodle, Discord, Jitsi Meet, Zoom і многія іншыя карысныя дадаткі выступілі сапраўднай знаходкай пры правядзенні такога маштабнага мерапрыемства. Менавіта гэтыя сучасныя тэхналогіі дазволілі абсалютна кожнаму студэнту, не адрываючыся ад свайго камп'ютара, сумясціць традыцыйнае і інавацыйнае, а таксама разнастаіць працэс правядзення канферэнцыі, зрабіўшы яе больш цікавай, разнастайнай і ўражлівай. Магчымасць паказаць сваю працу, магчымасць не толькі пачуць, але і ўбачыць сваіх калег і выкладчыкаў, магчымасць правядзення дыскусій у рэжыме рэальнага часу і нават магчымасць усё гэта запісаць – што можа быць лепш! (Саша Аношка)
Пленарнае пасяджэнне, якое прайшло на платформе "SKYPE FOR BUSINESS", адкрыў дэкан факультэта міжнародных адносін БДУ, д.г.н., прафесар Віктар Генадзьевіч Шадурскі, звярнуўшыся з прывітальным словам да ўдзельнікаў канферэнцыі. У якасці асноўнага дакладчыка пленарнага пасяджэння выступіў прарэктар па агульных пытаннях МГІМО- (У) МЗС РФ Арцём Уладзіміравіч Мальгін з дакладам аб навуковых дасягненнях і перспектывах развіцця МГІМО. Старшыня Савета па навукова-даследчай рабоце студэнтаў і аспірантаў ФМА БДУ Валогіна Вольга Віктараўна расказала пра спецыфіку працы секцый у анлайн-фармаце.
Больш за 620 студэнтаў факультэта зарэгістраваліся і выступілі з дакладамі ў 77 секцыях, а дзякуючы магчымасцям "SKYPE FOR BUSINESS" 140 удзельнікаў наведалі пленарнае пасяджэнне.
Кожны раз выступленні перад аўдыторыяй бударажаць. Адчуванне таго, што ўся ўвага сканцэнтравана на тым, што і як ты прамаўляеш, прымушае канцэнтравацца і хвалявацца. На жаль, адчуванні ад адказу па сетцы не настолькі вострыя, але ты разумееш, што гэта адбываецца з меркавання бяспекі. Акрамя дадзенага факту прыходзіць ўсведамленне таго, што ты атрымліваеш бясцэнны досвед працы са звыклага табе месца — дома ці інтэрната. Мне спадабалася тое, як была арганізавана канферэнцыя, і спадзяюся, што ў наступным годзе мы ўсім факультэтам паўторым поспех, але ўжо ў вочным варыянце. (Ігар Рабцаў)
Усё супер! Галоўнае, што ніякай каранавірус не перашкодзіў канферэнцыі адбыцца, прайшла яна ў іншым фармаце! (Нэлі Асіноўская)
Нягледзячы на тое, што ў падобным фармаце канферэнцыя праходзіла ўпершыню, яна мела поспех! Удзельнікі з такой жа ініцыятывай выступалі з дакладамі на відэаканферэнцыях, тэхніка дазваляла дэманстраваць усе неабходныя матэрыялы, такія як ілюстрацыі і прэзентацыі, а анлайн-фармат, у сваю чаргу, скараціў уздзеянне на навакольнае асяроддзе. Працаваць магчыма ў любых умовах, а прадуктыўна гэта выходзіць, калі падтрымка ідзе як з боку студэнтаў, так і з боку выкладчыкаў і адміністрацыі факультэта. 77-я навуковая канферэнцыя на ФМА прайшла на высокім узроўні! (Сафія Сямёнавіч)
Правядзенне пленарнага пасяджэння ў дыстанцыйным фармаце — гэта не толькі цікавы вопыт для ўсіх яго ўдзельнікаў, але і магчымасць зносін з паважанымі гасцямі. Дзякуючы запрошанаму госцю, прарэктару па агульных пытаннях МГІМО Арцёму Уладзіміравічу Мальгіну, мы даведаліся каштоўную інфармацыю, якая спатрэбіцца нам у будучыні. Пленарнае пасяджэнне дазволіла, па-першае, дакладна і эфектыўна вызначыць ход далейшага правядзення канферэнцыі, і, па-другое, стала пляцоўкай для бесперашкодных зносін і атрымання ведаў ад прадстаўніка МГІМО. (Віялета Бусло)
Выказваю вялікую падзяку калектыву факультэта міжнародных адносін за арганізаваную 77-ю навуковую канферэнцыю студэнтаў, магістрантаў і аспірантаў! Нягледзячы на цяжкасці і вымушаны пераход на анлайн-платформу, мерапрыемства было праведзена на высокім узроўні, а ўсе жадаючыя змаглі прыняць удзел і праявіць сябе. Асаблівую падзяку я хацеў бы выказаць маім навуковым кіраўнікам Фральцову В. В., Костачкінай В. В., а таксама старшыні секцыі французскай мовы Крэль Л.А. за прадстаўленую магчымасць і аказаную дапамогу ў ходзе падрыхтоўкі дакладаў! (Аляксандр Бабін)
{gallery}2020/2020_04_23_02{/gallery}