2 красавіка 2020 г. пасол Рэспублікі Польшча Артур Міхальскі пры садзейнічанні і ўдзеле дэкана ФМА прафесара Віктара Генадзьевіча Шадурскага правёў анлай-лекцыю на пляцоўцы Joinmenowin My Personal Room для студэнтаў ФМА, якія вывучаюць польскую мову, і для выкладчыкаў польскай мовы. І, як потым высветлілася, на лекцыі таксама змаглі віртуальна папрысутнічаць бацькі некаторых студэнтаў, якія ўсё зразумелі, нягледзячы на тое, што лекцыя была на польскай мове і вельмі пазітыўна адгукнуліся аб дадзеным мерапрыемстве. Тэма лекцыі — "Польская культура ў XXI стагоддзі".
У пачатку выступу Артур Міхальскі падкрэсліў, што культура з'яўляецца тым інструментам, які арганізуе грамадства. У гісторыі польскага народа культура адыграла фундаментальна важную ролю, дапамагаючы перажыць народу вельмі цяжкія часы, асабліва той перыяд, калі Польшча не была дзяржавай. І толькі дзякуючы культуры, мове, народным традыцыям, веры палякі захавалі агульнасць, пачуццё, што яны разам, і свядомасць таго, што ў народа ёсць жаданне сябраваць з усімі, але разам з тым і жаданне арганізаваць усё ва ўласным доме згодна са сваім прадстаўленнем. І калі б не было такіх выдатных дзеячоў культуры, якія ў сваёй творчасці адлюстроўвалі ўяўленні усяго польскага грамадства, то было б цяжка пасля ўсіх падзелаў Польшчы вярнуць сваю дзяржаву, у першую чаргу таму, што ў людзей не было б пачуцця адзінства. Артур Міхальскі параўнаў культуру таго перыяду з Ноевым каўчэгам, бо яна дапамагла пераадолець народу цяжкія часы. Так склалася гістарычна і геаграфічна, што Польшча з'яўлялася месцам сустрэчы культуры захаду і культуры усходу. Вялікі ўплыў на культуру Польшчы аказала прыняцце хрысціянства. Пасол нагадаў пра польскіх пісьменнікаў эпохі Рэнесансу, якія пісалі не па-латыні, а па-польску. Таксама XIX стагоддзе, знакамітае эпохай рамантызму, з'яўляецца часам росквіту дзейнасці вялікіх нацыянальных паэтаў. У першую чаргу тут варта назваць імёны Адама Міцкевіча з Навагрудка, Юліуша Славацкага з Украіны, Цыпрыяна Норвіда. Сваёй творчасцю яны аказвалі вялікі ўплыў на развіццё самасвядомасці польскага народа, не дазвалялі забываць сваю родную мову, свае нацыянальныя традыцыі, сваё мінулае, сваю дзяржаву і абуджалі імкненне палякаў да свабоды, да незалежнасці. Наглядным прыкладам таму служыць твор Адама Міцкевіча «Пан Тадэвуш». Творы паэтаў той эпохі паўплывалі на жаданне людзей не толькі чытаць, але і пачаць узброеную барацьбу за сваю свабоду, што прывяло да народных паўстанняў у Польшчы, якія скончыліся, на жаль, паражэннем, рэпрэсіямі ў дачыненні да ўдзельнікаў, што былі строга пакараны, кінуты ў турмы, сасланыя ў Сібір. Таму многія людзі ў Польшчы задумаліся над тым, што не такім шляхам яны павінны ісці, што не варта змагацца з дапамогай зброі, так як народу даводзіцца плаціць за гэта занадта дорага. І тут з'явіліся такія пісьменнікі як Генрых Сянкевіч і Баляслаў Прус, якія сваімі творамі не толькі вярталі людзей у іх гістарычнае мінулае, але і не дазвалялі яго забываць, давалі ім надзею, імпульсы для фарміравання нацыянальнай самасвядомасці і для кансалідацыі сілаў, якія можна было б выкарыстоўваць пры надыходзе зручнага выпадку для вызвалення Польшчы. Напрыканцы Першай сусветнай вайны для гэтага наступілі спрыяльныя абставіны. 11 лістапада 1918 года Польшча здабыла сваю незалежнасць.
Пасол Рэспублікі Польшча падкрэсліў, што нават у той перыяд, калі Польшча не была незалежнай дзяржавай, польская культура натхняла ўвесь свет, прыкладам чаму служыць прысуджэнне Нобелеўскай прэміі ў літаратуры Генрыку Сянкевічу ў 1905 годзе. На сённяшні дзень польскі народ ганарыцца пяццю сваімі лаўрэатамі Нобелеўскай прэміі ў літаратуры: Генрыхам Сянкевічам, Уладзіславам Рэймантам, Чэславам Мілашам, Веславай Шымборскай і Вольгай Такарчук.
У сваёй лекцыі Артур Міхальскі прывёў пераканаўчыя прыклады таго, як цесна звязана культура Польшчы з мовай, гісторыяй, рэлігіяй, свабодай, незалежнасцю дзяржавы. Так як лекцыя праходзіла ў дзень 15 гадавіны смерці Папы Рымскага Яна Паўла Другога, пасол Рэспублікі Польшча закрануў і пытанне яго адносін да польскай і сусветнай культуры. У канцы лекцыі, выказваючы падзяку за такую унікальную арганізацыю сустрэчы са студэнтамі, старшы выкладчык Т. З. Плашчынская працытавала выказванне Папы Рымскага Яна Паўла Другога пра культуру: «Kultura jest to, co czyni człowieka bardziej człowiekiem» Па заканчэнні лекцыі студэнты задалі амбасадару Рэспублікі Польшча свае пытанні, на якія ён з задавальненнем адказаў. Дзякуючы сустрэчы, студэнты атрымалі шмат новай для іх інфармацыі, тэм для разважання, яшчэ раз пераканаліся, якая гэта унікальная і выдатная мова, намецілі для сябе бліжэйшыя мэты па яе авалоданні і выказалі гатоўнасць на наступным тыдні паўтарыць дадзены фармат зносін з паслом Артурам Міхальскім па іншых тэмах. Таксама студэнты і выкладчыкі выказваюць вялікую ўдзячнасць дэкану ФМА прафесару Віктару Генадзьевічу Шадурскаму за арганізацыю лекцыі, за тое, што ён разам са студэнтамі актыўна ўдзельнічаў у абмеркаванні, за яго дапамогу ў папулярызацыі і развіцці польскай мовы на факультэце.
Плашчынская Т. З., старшы выкладчык кафедры германскіх моў