У цяперашні час студэнты-мытнікі 4 курса праходзяць завяршальную ў сваім навучанні практыку. Некаторыя з іх, у тым ліку і тыя, хто навучаецца па мэтавым наборы, шліфуюць атрыманыя ва ўніверсітэце практычныя навыкі на паўночна-заходнім участку беларускай мяжы.
Па просьбе кафедры двое студэнтаў падзяліліся сваімі ўражаннямі аб працоўных буднях на мытнай мяжы.
Кінеш В., стараста 13 групы 4 курса:
Нашы студэнты спрабуюць сябе ў будучай прафесіі на пасадах Гродзенскай рэгіянальнай мытні. Для больш шчыльнага знаёмства з рэальным жыццём мытнай службы ўпершыню ў гісторыі мытных органаў Рэспублікі Беларусь студэнты мэтавай формы навучання былі накіраваны ў пункты мытнага афармлення "Брузгі-2", "Прывалка" і "Бераставіца". Дзякуючы гэтай практыцы ім удалося азнаёміцца з мытнай інфраструктурай, вывучыць нюансы мытнага афармлення, дэкларавання і выплаты мытных плацяжоў, а таксама асвоіць розныя псіхалагічныя прыёмы падчас мытнага кантролю.
Дадзеная практыка з'яўляецца ў сваім родзе «курсам маладога байца». Нам удалося адчуць усю рамантыку дзённых і начных змен, якія доўжацца па 12 гадзін. Прыступаючы да працы пасля заканчэння ўніверсітэта, мы ўжо будзем добра падрыхтаваны не толькі ў тэарэтычным, але і практычным сэнсе. Як кажуць практыканты: «Кожны працоўны дзень напоўнены цікавымі выпадкамі і новымі ведамі, не ведаеш, чаго чакаць заўтра!».
Студэнты станоўча адклікаюцца аб прадстаўленай магчымасці, а таксама дзякуюць вопытным і спагадным супрацоўнікам за тое, што яны дзеляцца сваім практычным вопытам і паказваюць нам годныя прыклады службы.
Лізура Е., студэнтка 13 групы 4 курса:
Практыку я праходжу ў РПТО "Прывалка", размешчаным на мяжы з Літоўскай Рэспублікай. Да практыкантаў тут ставяцца з асаблівым цяплом — імкнуцца навучыць усяму неабходнаму для далейшай працы і не пакідаюць без адказу ні адно пытанне. На дадзены момант займаемся ў асноўным афармленнем часовага ўвозу транспартных сродкаў з замежных дзяржаў і дапамагаем супрацоўнікам. Яны навучаюць нас працы з праграмнымі прадуктамі, якія выкарыстоўваюць у сваёй дзейнасці, наглядна дэманструюць працэдуру ажыццяўлення мытнага кантролю, у тым ліку з прымяненнем тэхнічных сродкаў мытнага кантролю: часта выкарыстоўваецца рэнтгенаўская ўстаноўка для надгляду багажу, інспекцыйна-надглядны комплекс, надглядныя люстэркі і ліхтары.
Дзякуючы разнастайнай дзейнасці можна смела сказаць, што сумаваць тут сапраўды няма калі. Падчас практыкі спатрэбіліся атрыманыя веды не толькі ў сферы мытнай справы, але карыснай была і замежная мова. Так, я ўжо двойчы практыкавала італьянскую мову — дапамагала грамадзянам Італіі запаўняць анкету аб персанальных дадзеных.