Складаная эпідэміялагічная сітуацыя ў свеце – нагода для выкладчыка апрабаваць альтэрнатыўныя метады навучання і прадэманстраваць студэнтам, што ты ідзеш у нагу з часам і валодаеш навыкамі выкарыстання сучасных гаджэтаў і дэвайсаў.
Кафедра міжнароднага прыватнага і еўрапейскага права правяла са студэнтамі 3 курса анлайн лекцыі па дысцыпліне "Міжнароднае прыватнае права" з выкарыстаннем дадатку Skype і са студэнтамі 2 курса чаты ў сістэме кіравання навучання Moodle у рэжыме рэальнага часу.
Як гэта працуе? Элементарна!
- У Skype існуе функцыя "Сход" ("Собрание"), якая дазваляе стварыць прастору для сумеснай працы, прычым нават удзельнікаў, якія не выкарыстоўваюць Skype, гэта значыць незалежна ад наяўнасці запісу карыстальника ў дадзеным дадатку. У лекцыі, праведзенай загадчыкам кафедры А. В. Бабкінай, удзельнічала больш за 40 чалавек, аднак існуюць тэхнічныя абмежаванні ПА – не больш за 50 удзельнікаў.
Каб пачаць сход, трэба ўвайсці ў Skype і націснуць кнопку "Собрание". Вы ўбачыце спасылку для званка і кнопку «Падзяліцца запрашэннем», каб лёгка запрашаць іншых удзельнікаў. Акрамя таго, дадатак стварае спасылку, можна яе скапіяваць і накіраваць студэнтам (старасце), якія па спасылцы самі далучаюцца да сходу. У вызначаны час, у нашым выпадку – гэта час пачатку лекцыі згодна з раскладам – варта абраць відэазванок (або галасавы званок) і націснуць кнопку «Патэлефанаваць».
Дадатак працуе без замінак, але гэта залежыць ад хуткасці Інтэрнэту. Вартасць функцыі ў тым, што студэнты не толькі чуюць і бачаць лектара, але ёсць і зваротная сувязь – лектар чуе/чытае іх пытанні.
Існуе функцыя запісу лекцыі, адпаведны запіс выкладваецца прама ў гэтай групе і захоўваецца там 30 дзён. Гэта зручна для адсутных па ўважлівай прычыне і спатрэбіцца пры падрыхтоўцы да семінарскіх заняткаў.
- Што датычыцца прымянення сістэмы Moodle у рэжыме рэальнага часу дацэнтам А. Б. Леановіч былі задзейнічаны наступныя актыўнасці: прадастаўленне для вывучэння студэнтамі дэталёвых канспектаў лекцый і адкрыццё чата па зададзенай тэме. Усе яны патрабуюць прастаўленне студэнтам адзнакі аб выкананні, так што «прагуляць пары» у студэнта ніяк не атрымаецца!
Пасля вывучэння канспекта студэнт ўдзельнічае ў чаце з лектарам у рэжыме рэальнага часу: каментуе прававыя нормы, задае пытанні, атрымлівае адказы і рэкамендацыі, на што звярнуць увагу пры вывучэнні адпаведнай тэмы.
Абодва рэсурсы прадастаўляюць выкладчыку магчымасць бачыць, хто прысутнічае на занятку, спалучаць агульную інфармацыю з індывідуальным падыходам, паколькі студэнт можа адрасаваць лектару ўсе пытанні, у тым ліку тыя, якія ён пасаромеўся задаць у аўдыторыі. Гэта займальна для абодвух бакоў навучальнага працэсу, збліжае выкладчыка і студэнта, дазваляе ўлічыць асаблівасці кожнага навучэнца.
{gallery}2020/2020_03_16{/gallery}