3 сакавіка 2020 г. студэнты 13 групы спецыяльнасці «Мытная справа» разам з дацэнтам Уладзімірам Ляхаўскім прынялі ўдзел у мерапрыемствах фізічнага факультэта БДУ, прысвечаных «Дню атамных тэхналогій». У рамках праграмы дадзенага мерапрыемства студэнты наведалі розныя адукацыйна-забаўляльныя конкурсы, арганізаваныя студэнтамі фізмата, а таксама фотавыставу «Атамныя тэхналогіі Расіі», прысвечаную 75-годдзю расійскай атамнай энергетыкі. У асноўнай частцы праграмы былі праслуханы лекцыі па актуальных пытаннях развіцця атамнай энергетыкі ў Беларусі, Расіі і ў іншых краінах. Вялікую цікавасць у будучых мытнікаў выклікала лекцыя намесніка генеральнага дырэктара МАГАТЭ Міхаіла Чудакова, прысвечаная тэме арганізацыі ядзернай бяспекі на глабальным і рэгіянальным узроўнях. Высокапастаўленаму міжнароднаму чыноўніку будучымі супрацоўнікамі беларускай мытні былі зададзены пытанні аб супрацоўніцтве МАГАТЭ і Дзяржаўнага мытнага камітэта Рэспублікі Беларусь у навукова-тэхнічнай сферы, а таксама пра ролю супрацоўніцтва МАГАТЭ і Сусветнай мытнай арганізацыі ў барацьбе з незаконным перамяшчэннем і продажам радыеактыўных рэчываў.