20 лістапада факультэт міжнародных адносін БДУ наведаў генеральны дырэктар Галоўнага ўпраўлення палітычнага планавання Міністэрства замежных спраў Рэспублікі Куба спадар Маркас Ферміна Радрыгес Коста, а таксама Надзвычайны і Паўнамоцны Пасол Рэспублікі Куба ў Рэспубліцы Беларусь спадар Хуан Вальдэс Фігероа і іншыя супрацоўнікі кубінскай амбасады.

Кубінскія дыпламаты сустрэліся з выкладчыкамі и студэнтамі, якія вывучаюць іспанскую мову. На сустрэчы спадар Маркас Ферміна Радрыгес Коста выступіў з лекцыяй, асвятліўшы асноўныя пытанні кубінскай знешняй і ўнутранай палітыкі, сацыяльна-эканамічную сітуацыю і асобныя аспекты двухбаковага супрацоўніцтва ў галіне адукацыі, а таксама адказаў на пытанні студэнтаў. У ходзе сустрэчы студэнты закранулі такія пытанні як статус Кубы на сучаснай сусветнай арэне, праблема эканамічных санкцый з боку ЗША і прычыны выкарыстання двух грашовых адзінак, абмеркавалі прывабнасць Кубы для турыстаў, небагатыя прыродныя рэсурсы вострава і магчымасці абмену студэнтамі. Удзельнікам мерапрыемства быў прапанаваны да прагляду фільм, прысвечаны святкаванню 500-годдзя заснавання г. Гаваны. Сустрэча прайшла ў цёплай і сяброўскай абстаноўцы.

Аксана Рыгораўна Паляшчук, старшы выкладчык кафедры раманскіх моў