У сераду, 6 лістапада 2019 года, на факультэце міжнародных адносін Беларускага дзяржаўнага ўніверсітэта адбылася сустрэча студэнтаў спецыяльнасцяў «Міжнародныя адносіны», «Менеджмент у сферы міжнароднага турызму», «Сусветная эканоміка», выкладчыкаў кафедры міжнародных адносін, кафедры міжнароднага турызму, кафедры раманскіх моў з Надзвычайным і Паўнамоцным Паслом Бельгіі ў Расійскай Федэрацыі, Рэспубліцы Беларусь, Рэспубліцы Арменія і Рэспубліцы Узбекістан спадаром Жанам-Артурам Рэжыбо. Госцем сустрэчы стаў Дарадца па пытаннях эканомікі і гандлю Пасольства Бельгіі Жэрар Сегерс. Зацікаўленыя слухачы мелі ўнікальную магчымасць паслухаць лекцыі на французскай і на англійскай мове. Спадар Амбасадар асвятліў асаблівасці дзяржаўнага ладу Бельгіі, адзначыў прычыны цяперашняга ўрадавага крызісу ў Каралеўстве, выклаў асноўныя прынцыпы бельгійскага ўрада пры правядзенні знешняй і ўнутранай палітыкі.
Сустрэчу Жан-Артур Рэжыбо пачаў з аповяду пра сваю дзейнасць, падзяліўся вопытам дыпламатычнай службы ў Расіі, узаемаадносінах паміж Беларуссю і Бельгіяй. Ён адзначыў, што розніцы паміж беларусамі і бельгійцамі практычна не бачыць і няма ніякіх перашкод на шляху паглыблення ўзаемаадносін паміж краінамі.
У другой частцы займальнай лекцыі студэнты змаглі задаць спадару Амбасадару актуальныя пытанні, прадэманстраваўшы не толькі веданне замежнай мовы, але і высокую цікавасць да развіцця сучасных міжнародных адносін. Дыскусія дазволіла студэнтам азнаёміцца з афіцыйнай пазіцыяй Бельгіі па шматлікіх тэмах як рэгіянальнага, так і глабальнага характару. Месье Жан-Артур Рэжыбо ласкава адказаў на ўсе пытанні, падкрэсліў важнасць развіцця культурных, гандлёва-эканамічных сувязяў, актывізацыі абмену вопытам у галіне адукацыі паміж Рэспублікай Беларусь і Каралеўствам Бельгія.
Студэнтам было таксама цікава даведацца аб супрацоўніцтве Бельгіі і Беларусі ў акадэмічнай сферы. Пасол адзначыў, што расце колькасць бельгійцаў, якія вывучаюць рускую мову і едуць на вучобу ў Мінск ці Маскву, для беларусаў таксама ёсць магчымасці для навучання ў Бельгіі.
Удзельнікі сустрэчы ўдзячныя спадару Амбасадару за разгорнутыя, дэталізаваныя адказы, якія дазволілі значна паглыбіць веды, сфарміраваць цэласнае ўяўленне аб становішчы спраў па цікавячых іх пытаннях. Асобную падзяку студэнты факультэта міжнародных адносін выказваюць Амбасадзе Бельгіі ў Расійскай Федэрацыі, Рэспубліцы Беларусь, Рэспубліцы Арменія і Рэспубліцы Узбекістан за прадстаўленую магчымасць зносін са спецыялістам такога высокага ўзроўню.
Аляксандр Бабін, студэнт 2 курса спецыяльнасці "Міжнародныя адносіны",
Алена Дудкова, студэнтка 3 курса спецыяльнасці "Сусветная эканоміка»
