17 кастрычніка 2019 г. на факультэце міжнародных адносін БДУ адбылася лекцыя запрошанага прафесара Цілбургскай школы права (Нідэрланды) Ніколы Ягерс «Дыскрымінацыя ў сферы працоўнай дзейнасці». Прафесар Ягерс працуе ў сферы міжнароднага права, з'яўляецца аўтарам шматлікіх даследчых праектаў і публікацый па пытаннях карпаратыўнай адказнасці, разглядае пытанні наступства пашырэння гандлю і ўніверсалізацыі наступстваў правоў чалавека на нацыянальным і міжнародным узроўнях.
У сваёй лекцыі на англійскай мове прафесар Ягерс вельмі жыва і наглядна патлумачыла ключавыя праблемы недыскрымінацыі ў сферы працы, чым выклікала непадробную цікавасць з боку нашых студэнтаў спецыяльнасці "Міжнароднае права":
Арцём Грыгаран, 2 курс: «Лекцыя, праведзеная прафесарам Ніколай Ягерс, была выдатнай. Быў узняты шэраг вострых на сённяшні дзень пытанняў, звязаных з рознага роду дыскрымінацыяй у сферы працоўнага права. Было вельмі цікава даведацца пра адрозненні ў праве Каралеўства Нідэрландаў і Рэспублікі Беларусь, а таксама бліжэй пазнаёміцца з Міжнароднай арганізацыяй працы. Акрамя ўсяго іншага хацелася б адзначыць неверагодную харызматычнасць прафесара Ягерс. Яе выступленне прыцягвала ўвагу на працягу ўсёй лекцыі».
Ганна Муха, 2 курс: "Нікола старалася ўзаемадзейнічаць з намі, задаючы пытанні ці проста жадаючы пачуць наша меркаванне аб праблеме. Прафесар валодае выдатнай дыкцыяй, харызмай і высокім узроўнем англійскай мовы, якую хацелася слухаць і слухаць. Было б выдатна бачыць у сценах нашага факультэта больш такіхцікавых асоб".
Іван Юрэвіч, 2 курс: «Падчас лекцыі быў закрануты шэраг важных аспектаў, якія тычацца недыскрымінацыі ў сферы працы. Прафесар зрабіла акцэнт на міжнародна-прававым рэгуляванні дадзенай галіны, раскрыла сутнасць паняцця дыскрымінацыі і яе класіфікацыю ў сучаснай дактрыне працоўнага права, пазнаёміла слухачоў з асноўнымі асаблівасцямі рэгулявання гэтай сферы ў Нідэрландах, а таксама разам са студэнтамі паспрабавала вызначыць ступень эфектыўнасці мер, якія прымаюцца для папярэджання дыскрымінацыі ў сферы працоўнай дзейнасці. Па заканчэнні лекцыі ўдзельнікі мелі магчымасць асабіста задаць прафесару пытанні і падзякаваць за праведзенае мерапрыемства».
Сафія Сямёнавіч, 2 курс: «Лекцыя на тэму дыскрымінацыі на рынку працы была вельмі карыснай, нягледзячы на тое, што размова ў большай ступені ішла пра Нідэрланды. У сучасным свеце дыскрымінацыя ў сферы працы, на першы погляд, здаецца не гэтак распаўсюджанай праблемай, аднак з дапамогай прафесара Ніколы Ягерс я змагла больш выразна зразумець, што дадзеная праблема актуальная, а таксама я змагла высветліць вытокі дыскрымінацыі і магчымыя шляхі іх вырашэньня. Неабходна, каб людзі не ўспрымалі адмову на прыняцце на якую-небудзь пасаду як факт, варта разабрацца і зразумець, што там няма прыкмет дыскрымінацыі, няхай гэта будзе па палавой або ўзроставай прыкмеце. Усведамленне праблемы вельмі важна, але яшчэ важней павышэнне дасведчанасці, чаго часам так не хапае».
Дар'я Бела, 2 курс: «На лекцыі прафесара Цілбургскай школы права Ніколы Ягерс былі раскрыты асаблівасці прамой, ускоснай і змешанай дыскрымінацыі. Асноўны ўпор у прэзентацыі матэрыялу ставіўся на ўскоснай дыскрымінацыі, паколькі менавіта гэты тып з'яўляецца пераважным ў Нідэрландах. У грамадстве, дзе прадстаўлены розныя рэлігійныя групы, разнастайныя нацыянальнасці, працадаўца робіць акцэнт на насельніцтве дзяржавы, якое не належыць да ліку імігрантаў або іх нашчадкаў, тым самым выяўляючы ўскосную дыскрымінацыю. У ходзе лекцыі студэнты прапаноўвалі варыянты вырашэння дадзенага пытання: напрыклад, разгляд заяў на працу без ўказання імя і некаторых пашпартных дадзеных. На лекцыі таксама былі разгледжаны некалькі прыкладаў дыскрымінацыі работнікаў, якія абапіраліся на рашэнні суда па аналагічных справах».
Лізавета Ялак, 2 курс: «Былі разгледжаны тэмы прамой і ўскоснай дыскрымінацыі, а таксама варыянты рашэння дадзенай праблемы. У цэлым, мы бачым, што дыскрымінацыя – адна з галоўных праблем інфармацыйнага грамадства ў дадзены момант. У якой бы краіне мы не жылі – высокаразвітай ці не – паўсюдна ёсьць дыскрымінацыя. Менавіта таму варта задумацца аб эфектыўным вырашэнні. Вялікі дзякуй факультэту міжнародных адносін за прадстаўленую магчымасць паслухаць такі цікавы і нестандартны матэрыял!»
Матэрыял падрыхтаваны В. В. Костачкінай, старшым выкладчыкам кафедры англійскай мовы гуманітарных спецыяльнасцяў
