27 жніўня 2019 года на факультэце міжнародных адносін Беларускага дзяржаўнага ўніверсітэта прайшла сустрэча ўдзельнікаў студэнцкага праекта «Форум маладых лідэраў (YLF) ФМА БДУ» з дэлегацыяй нямецкіх дэпутатаў, якія наведалі Беларусь у складзе парламенцкай групы. Дэлегацыю прадстаўлялі члены Сацыял-дэмакратычнай партыі Германіі: член Камітэта па міжнародных справах Бундэстагу, былы Федэральны міністр навакольнага асяроддзя, аховы прыроды і ядзернай бяспекі ФРГ Барбара Хендрыкс, намеснік кіраўніка германска-беларускай парламенцкай групы Бундэстага Олівер Качмарак, дэпутаты Бундэстагу Рэнэ Роспель і Фрытц Фельгентрой, а таксама дэпутат Еўрапейскага парламента Йоахім Шустэр.
Тэмай, вынесенай на абмеркаванне, стала супрацоўніцтва паміж Германіяй і Беларуссю ў сферы ўніверсітэцкай адукацыі і існуючыя праграмы акадэмічнага абмену. Праграма сустрэчы складалася з некалькіх блокаў, мадэраванне якіх узяў на сябе студэнт 4 курса спецыяльнасці "Міжнародныя адносіны" Уладзіслаў Кучаравенка. Рабочай мовай мерапрыемства была англійская.
У самым пачатку мерапрыемства з прывітальным словам выступіў дэкан нашага факультэта Віктар Генадзьевіч Шадурскі, якому з першых хвілін удалося прыўнесці нязмушаную сяброўскую танальнасць у рабочую атмасферу мерапрыемства.
Першым пунктам праграмы стала самапрэзентацыя праекта «Форум маладых лідэраў (YLF) ФМА БДУ». Студэнт 4 курса спецыяльнасці "Сусветная эканоміка" Алег Скачкоў у першую чаргу азнаёміў удзельнікаў сустрэчы з самым фарматам праекта, галоўнай мэтай якога з'яўляецца выяўленне і падтрымка студэнтаў факультэта з высокім прафесійным патэнцыялам, актыўнай жыццёвай пазіцыяй і лідэрскімі якасцямі. Затым у прэзентацыі былі прадстаўлены асобныя найбольш значныя мерапрыемствы праграмы дадзенага адукацыйнага форуму, праведзеныя на базе нашага факультэта ў мінулым навучальным годзе, якія прадстаўлялі сабой серыю навучальных трэнінгаў, семінараў, нефармальных сустрэч і дыялогаў, накіраваных на развіццё ў яго ўдзельнікаў лідэрскага і арганізацыйнага патэнцыялу і стварэнне ўмоў для іх рэалізацыі ва ўмовах праектнай дзейнасці.
Далей па праграме ішоў кароткі агляд адукацыйных праграм акадэмічнай мабільнасці студэнтаў БДУ за мяжой, прадставіць які ласкава пагадзіўся начальнік аддзела адукацыйных праграм БДУ Аляксандр Уладзіміравіч Рытаў. Разам з агляднай інфармацыяй агульнага характару і некаторымі аналітычнымі выкладкамі аб бягучым становішчы спраў, Аляксандр Уладзіміравіч звярнуў увагу прысутных студэнтаў на інфармацыйныя рэсурсы БДУ, прысвечаныя замежным адукацыйным праграмам і даў адказы на актуальныя пытанні.
Самае першае пытанне, якім задаюцца студэнты, якія жадаюць скарыстацца магчымасцямі акадэмічнай мабільнасці, дзе можна азнаёміцца з пералікам і апісаннем такога роду праграм.
Такім чынам, ёсць 3 асноўных рэсура:
- www.ums.bsu.by;
- www.mobility.bsu.by – дзе вы таксама зможаце абраць пэўную краіну і паглядзець варыянты праграм і ўніверсітэтаў; прачытаць водгукі-эсэ студэнтаў, якія ўжо паўдзельнічалі;
- група з сацыяльнай сетцы Facebook: www.fb.com/ums.bsu.
Наступнае важнае пытанне для патэнцыйных кандыдатаў: якімі крытэрамі кіруюцца адказныя арганізатары конкурснага адбор, на што яны звяртаюць увагу ў першую чаргу і што неабходна абавязкова ўлічыць пры падачы дакументаў на ўдзел у конкурсе? Такім чынам:
- паспяховасць (вышэй 7,0);
- мова: перавага аддаецца студэнтам, якія маюць дакумент, што пацвярджае ўзровень валодання дадзенай мовай;
- і адзін з самых важных пунктаў: матывацыйны ліст з выразна складзеным планам навучання за мяжой і сфармуляваным адказам на пытанне, як атрыманыя вопыт і веды будуць ужытыя Вамі ў будучыні.
Варта таксама адзначыць, што перавагу аддаюць тым студэнтам, якія яшчэ не ўдзельнічалі ў падобных праграмах, каб даць такую магчымасць большай колькасці нашых студэнтаў.
У сваім выступе начальнік аддзела адукацыйных праграм таксама прывёў найбольш цікавыя прыклады зводнай статыстыкі. Так, напрыклад, па праграме Erasmus + ад БДУ у год вучацца за мяжой каля 1000 чалавек, ад ФМА – каля 50 чалавек у семестр. За гэты год па праграмах абмену пабывалі 1302 чалавека (з іх 50% – студэнты і 50% – персанал). Таксама ў рамках блока, прысвечанага адукацыйным праграмам, нашы студэнты падзяліліся сваім асабістым вопытам удзелу ў розных праграмах акадэмічнага абмену ў Германіі, ЗША і Кітаі.
Трэці блок праграмы «Перашкоды і магчымасці акадэмічнага абмену з перспектывы беларускіх студэнтаў» правёў удзельнік праекта Зміцер Краснюк. Свой выступ студэнт 4 курса спецыяльнасці "Міжнародныя адносіны" пабудаваў на SWOT аналізе існуючага становішча і забяспечыў яго мноствам цікавай інфармацыі. Да прыкладу, ён распавёў пра тое, якія кампетэнцыі і якасці набываюць студэнты падчас стажыровак за мяжой, і прааналізаваў топ-3 напрамкі ўдзелу нашых студэнтаў у міжнародных адукацыйных праграмах.
Чацвёртым заключным блокам праграмы сталі непасрэдныя зносіны студэнтаў і парламентарыяў у рамках зададзенай тэмы, якія праходзілі ў форме пытанняў і адказаў, каментараў і жывой дыскусіі ўдзельнікаў.
Вікторыя Рабава, студэнтка 4 курса, спецыяльнасці "Сусветная эканоміка"
Каардынатар праекта — С. В. Палічэнкаў, старшы выкладчык кафедры германскіх моў
