Сустрэча з Надзвычайным і Паўнамоцным Паслом Кыргызскай Рэспублікі ў Рэспубліцы Беларусь Кубанычбекам Касымавічам Амураліевым адбылася 25 сакавіка 2019 г. на факультэце міжнародных адносін БДУ. Выкладчыкі і студэнты спецыяльнасцяў "Менеджмент у сферы міжнароднага турызму», «Міжнародныя адносіны», «Лінгвакраіназнаўства» і «Мытная справа» атрымалі ўнікальную магчымасць пашырыць уяўленне аб сучасным развіцці і знешнепалітычным курсе Кыргызскай Рэспублікі – аднаго з найважнейшых міжнародных партнёраў Рэспублікі Беларусь і актыўнага ўдзельніка працэсу еўразійскай інтэграцыі.

Кіраўнік дыпламатычнага прадстаўніцтва Кыргызскай Рэспублікі ў Мінску коратка спыніўся на характарыстыцы сучаснай знешняй палітыкі сваёй дзяржавы, сучасным стане і перспектывах беларуска-кыргызскага супрацоўніцтва ў розных сферах.

Тэма выступлення знайшла жывы водгук у прысутных на сустрэчы выкладчыкаў і студэнтаў. Пра гэта сведчылі актыўная дыскусія і шматлікія пытанні, зададзеныя прадстаўніку Кыргызстана. У фокусе абмеркавання апынуліся такія тэмы, як будучыня еўразійскай інтэграцыі, унікальны вопыт пабудовы дэмакратычнай дзяржавы і рынкавай эканомікі ў Кыргызскай Рэспубліцы, міжэтнічныя адносіны ў гэтай краіне. Вялікую цікавасць выклікала абмеркаванне ролі найвялікшага пісьменніка і філосафа Чынгіза Айтматава ў станаўленні і развіцці кыргызскай дзяржаўнасці ў канцы ХХ – пачатку ХХI стст., ініцыятарам якога стаў дэкан ФМА, прафесар В. Г. Шадурскі. Не застаўся па-за ўвагай і багаты дыпламатычны вопыт кіраўніка Пасольства Кыргызстана, якім ён падзяліўся са студэнтамі.

У заключэнне ўсе ўдзельнікі сустрэчы пажадалі Кубанычбеку Касымавічу Амураліеву поспехаў у яго далейшай дыпламатычнай кар'еры, якая ў хуткім часе працягнецца ў сталіцы ўжо іншай дзяржавы, і выказалі надзею, што такія цікавыя і змястоўныя сустрэчы з прадстаўнікамі дыпламатычнага корпуса, акрэдытаваныга ў Рэспубліцы Беларусь, будуць праводзіцца часцей.