Міжнародная навукова-практычная канферэнцыя "Беларусь у свеце, які змяняецца: гісторыя і сучаснасць", прымеркаваная да стогадовай гадавіны ўзнікнення беларускай дыпламатыі, адбылася 22 лютага 2019 г. на факультэце міжнародных адносін БДУ.
У якасці арганізатара выступіла кафедра міжнародных адносін ФМА БДУ пры падтрымцы кафедры дыпламатычнай і консульскай службы, Цэнтра еўразійскіх і еўрапейскіх даследаванняў, Цэнтра вывучэння знешняй палітыкі ЗША і актыўным удзеле Прадстаўніцтва германскага Фонду імя Ф. Эберта ва Украіне і Беларусі. У рабоце канферэнцыі прынялі ўдзел даследчыкі і эксперты з Беларусі, Расіі, Польшчы, Украіны, Латвіі, Кітая, якія абмеркавалі розныя аспекты і праблемы знешняй палітыкі Рэспублікі Беларусь і сучасных міжнародных адносін.
З прывітальным словам да ўдзельнікаў і гасцей канферэнцыі звярнуліся намеснік Міністра замежных спраў Рэспублікі Беларусь А. І. Краўчанка, прарэктар па навуковай рабоце БДУ В. Г. Сафонаў, Надзвычайны і Паўнамоцны Пасол ФРГ у Рэспубліцы Беларусь П. Дэтмар.
Кіраўнікі МЗС Рэспублікі Беларусь у 1990-я гг. — пачатку ХХІ ст. П. К. Краўчанка, В. Л. Сянько, І. І. Антановіч, М. М. Хвастоў пазначылі найбольш важныя вынікі стогадовага шляху, які прайшла айчынная дыпламатыя ў складаных умовах фарміравання і ўмацавання беларускай дзяржаўнасці. У канферэнцыі таксама прынялі ўдзел першы Надзвычайны і Паўнамоцны Пасол ФРГ у Рэспубліцы Беларусь Р. Краўс і вядучы эксперт СДПГ і Германскага таварыства знешняй палітыкі ў сферы знешняй палітыкі К. Фойгт. Р. Краўс звярнуў увагу на найважнейшыя перадумовы і заканамернасці сучасных міжнародных адносін, вынікі і перспектывы развіцця беларуска-германскага супрацоўніцтва. К. Фойгт прадставіў новае бачанне перспектыў міжнародных адносін і геапалітычнага становішча Беларусі ў кантэксце супярэчнасцяў паміж краінамі Захаду і Расіяй. Вялікую цікавасць выклікаў грунтоўны даклад доктара гістарычных навук, Надзвычайнага і Паўнамоцнага Пасла Латвійскай Рэспублікі ў Рэспубліцы Беларусь М. Вірсіса, які даў усебаковую характарыстыку стану беларуска-латвійскіх адносін ва ўмовах фарміравання новай сістэмы міжнародных адносін пасля заканчэння Першай сусветнай вайны.
Работа канферэнцыі праходзіла ў пяці секцыях. На секцыях абмяркоўваліся праблемы гістарычнай рэтраспектывы знешняй палітыкі Беларусі, еўрапейскай і еўразійскай інтэграцыі, глабальных палітычных трансфармацый, уключаючы фарміраванне новых трансатлантычных адносін і рэалізацыю кітайскай ініцыятывы "пояса і шляху», развіцця беларускай дыпламатыі ў сучасных умовах.
Вынікі канферэнцыі дазволілі даць комплексную ацэнку сучаснага стану міжнародных адносін, вызначыць задачы знешняй палітыкі Рэспублікі Беларусь на сучасным этапе на аснове назапашанага гістарычнага вопыту і рэальных магчымасцяў беларускай дзяржавы.
Важным складнікам канферэнцыі сталі аглядныя лекцыі, якія кіраўніка МЗС Рэспублікі Беларусь П. К. Краўчанка, В. Л. Сянько, І. І. Антановіч, М. М. Хвастоў правялі для студэнтаў 1-3-га курсаў спецыяльнасцяў "Міжнародныя адносіны" і "Міжнароднае права". Студэнты атрымалі магчымасць пазнаёміцца з багатым дыпламатычным вопытам гасцей канферэнцыі, скласці ўласнае ўяўленне аб высокіх патрабаваннях да дыпламатычнай працы ў сучасных умовах. Дзелячыся ўражаннямі, будучыя спецыялісты-міжнароднікі адзначылі:
— лекцыя Івана Іванавіча Антановіча прымусіла задумацца, якімі якасцямі павінен валодаць будучы дыпламат, каб адстаяць інтарэсы сваёй дзяржавы (Аляксандр Гурыновіч, 1 курс спецыяльнасць "Міжнародныя адносіны");
— дзякуючы Пятру Кузьмічу Краўчанку мы пазнаёміліся са знешнепалітычнай дзейнасцю Беларусі праз прызму работы міністраў замежных спраў (Дзмітрый Бялько, 3 курс спецыяльнасць "Міжнародныя адносіны").
— Для нас вельмі важна разумець, як развіваецца сучасны свет і якім чынам павінна дзейнічаць Рэспубліка Беларусь, каб эфектыўна супрацоўнічаць з іншымі краінамі (Аляксандр Бабій, 1 курс спецыяльнасць "Міжнародныя адносіны").
