23 кастрычніка 2026 г. Міністр замежных спраў Беларусі Максім Рыжанкоў прыняў удзел ва ўрачыстым мерапрыемстве, прымеркаваным да Дня ААН, які штогод адзначаецца 24 кастрычніка.
Мерапрыемства прайшло ў МЗС Беларусі ў інтэрактыўным фармаце Мадэлі ААН "Прызначэнне Генеральнага сакратара ААН". Пад старшынствам кіраўніка беларускага знешнепалітычнага ведамства было змадэліравана пасяджэнне Генеральнай Асамблеі ААН па разглядзе кандыдатуры на пасаду кіраўніка арганізацыі.
У мерапрыемстве прынялі ўдзел Пастаянны каардынатар ААН у Беларусі Расул Багіраў, прадстаўнікі краінавай каманды ААН, супрацоўнікі МЗС, члены Асацыяцыі ветэранаў дыпламатычнай службы Беларусі, а таксама выкладчыкі і студэнты факультэта міжнародных адносін БДУ.
У сваім прывітальным слове Міністр замежных спраў звярнуў увагу на гістарычны статус Беларусі як дзяржавы - заснавальніка ААН. Кіраўнік МЗС даў разгорнутую і шчырую ацэнку цяперашняму стану арганізацыі, адзначыўшы крызіс даверу, глабальную канфрантацыю і спробы падмены міжнароднага права.
Разам з тым Максім Рыжанкоў запэўніў, што Беларусь працягне актыўна працаваць над вяртаннем у сцены ААН канструктыўнага дыялогу, абараняць Статут ААН і прасоўваць свае ініцыятывы – ад барацьбы з гандлем людзьмі да захавання традыцыйных сямейных каштоўнасцяў.
Міністр падкрэсліў значнасць Мадэлі ААН як шматгадовай традыцыі, якая дазваляе супрацоўнікам МЗС перадаваць дыпламатычны вопыт студэнтам ФМА, а тым, у сваю чаргу, – бліжэй пазнаёміцца з будучай прафесіяй і развіць неабходныя навыкі.
Да ўдзельнікаў мерапрыемства таксама звярнуўся Пастаянны каардынатар ААН у Беларусі Расул Багіраў, які, падкрэсліўшы статус Беларусі як краіны - заснавальніцы ААН, адзначыў яе значны ўклад у работу арганізацыі на ўсіх узроўнях (краінавым, рэгіянальным і глабальным).
Па выніках Мадэлі ААН адбылася цырымонія ўзнагароджання, падчас якой найбольш актыўным студэнтам ФМА БДУ былі ўручаны памятныя сертыфікаты і падарункі.
Крыніца: сайт МЗС Рэспублікі Беларусь
