4 мая 2026 года студэнты 2 курса спецыяльнасці «Міжнародныя адносіны» Ілля Бярозаў і Валерыя Байгот наведалі дзяржаўную ўстанову адукацыі «Гімназія №1 імя Данілы Іванавіча Валковіча г. Масты», дзе правялі прафарыентацыйную сустрэчу з навучэнцамі 10–11 класаў.

У час размовы госці расказалі старшакласнікам аб правілах паступлення на спецыяльнасць "Міжнародныя адносіны", асаблівасцях адукацыйнага працэсу, а таксама аб магчымасцях навуковай і грамадскай дзейнасці студэнтаў факультэта міжнародных адносін Беларускага дзяржаўнага ўніверсітэта. Асаблівую ўвагу надалі пытанням студэнцкага жыцця: падзяліліся ўласнымі ўражаннямі аб вучобе, удзеле ў мерапрыемствах факультэта і адаптацыі да ўніверсітэцкага асяроддзя. Школьнікі актыўна ўключаліся ў дыялог, цікавіліся перспектывамі прафесіі і ўмовамі паступлення.

Прафарыентацыйная сустрэча прайшла ў цёплай і адкрытай атмасферы і стала для навучэнцаў магчымасцю больш даведацца аб факультэце міжнародных адносін БДУ і будучай прафесійнай траекторыі.