25 мая 2026 года на факультэце міжнародных адносін адбылося выніковае ў гэтым навучальным годзе пасяджэнне гуртка аратарскага майстэрства і дэбатаў Debate on FIRe кафедры англійскай мовы міжнароднай прафесійнай дзейнасці (кіраўнікі – кандыдат педагагічных навук, дацэнт М. В. Натуркач і старшы выкладчык, магістр міжкультурнай камунікацыі С. У. Салаўёва). Тэмай для абмеркавання сталі пытанні міжкультурнай камунікацыі ў сучасным дзелавым асяроддзі.

У рамках пасяджэння студэнты абмеркавалі спецыфіку зносін у міжнародных прафесійных камандах на аснове аналізу сітуацый, прадстаўленых у аўтэнтычных адукацыйных падкастах. Адмысловая ўвага была нададзена складанасцям, якія могуць узнікаць, калі людзі з розных краін, культур і моўных асяроддзяў працуюць разам. Студэнты адзначылі, што паспяховае супрацоўніцтва ў такіх умовах патрабуе павагі да навакольных, цярпення, гнуткасці і ўмення слухаць іншых. Гэта актуалізуе неабходнасць работы над удасканаленнем прафесійнай іншамоўнай кампетэнцыі, павышэннем ўзроўню культурнага інтэлекту (CQ), пашырэннем лінгвакраіназнаўчага кругагляду.

Студэнты таксама абмеркавалі планаванне офіснай прасторы і яе ўплыў на камунікацыю на працоўным месцы. Яны разгледзелі, як камфортны і добра арганізаваны офіс дапамагае людзям працаваць больш эфектыўна, размаўляць больш адкрыта і па-сапраўднаму адчуваць сябе часткай каманды. Удзельнікі звярнулі ўвагу на тое, што пры планаванні інтэр'еру ў офісе неабходна ўлічваць запатрабаванні людзей з розным культурным і прафесійным досведам.

Па выніку пасяджэння студэнты атрымалі больш усвядомленае ўяўленне аб важнасці аспекта міжкультурнай камунікацыі ў прафесійным асяроддзі. Дыскусія дапамагла ўдзельнікам убачыць, як культурныя адрозненні могуць стаць імпульсам для рэалізацыі новых творчых ідэй. Пасяджэнне гуртка аратарскага майстэрства і дэбатаў Debate on FIRe стала карыснай пляцоўкай для абмену думкамі і развіцця практычных камунікатыўных навыкаў на англійскай мове. Яно дапамагло студэнтам аб'ектыўна ацаніць значнасць канструктыўнага міжкультурнага дыялогу ў пабудове эфектыўнай каманднай работы ў іх будучай прафесійнай дзейнасці.

Ягор Бараноўскі, студэнт 1-га курса спецыяльнасці "Міжнароднае права"