У рабоце гуртка “CINEMATES” (кіраўнік ст. выкладчык кафедры англійскай мовы міжнароднай прафесійнай дзейнасці Касцерава М. А.) мы ніколі не прапускаем важныя для краіны даты. Стараемся, каб нашы віншаванні сябрам-студэнтам, выкладчыкам і адміністрацыі факультэта былі арыгінальныя і запомніліся.
Напрыклад, да 8 Сакавіка для нашых дарагіх выкладчыкаў мы падрыхтавалі паштоўкі ў стылі арыгамі са словамі “You teach us more than grammar”. А калі мы рыхтаваліся да святкавання 9 Мая, намеснік старасты гуртка Міхаіл Камісарчык прапанаваў расказаць пра членаў сям'і студэнтаў факультэта, якія ваявалі ў Другой сусветнай вайне. Час бяжыць хутка, і мы гаворым ужо не пра дзядоў, а прадзедаў, чые гісторыі беражліва захоўваюць сем'і студэнтаў факультэта.
Так, прадзед Марыны Кудзін, Лук'янавіч Іван Рафаловіч, прайшоўшы ўсю Вялікую Айчынную вайну, за асабістую адвагу і мужнасць быў узнагароджаны Ордэнам Айчыннай вайны II ступені. Прадзед Аляксея Няверава, Ціханаў Ціхан Аўрамавіч, камандзір дыверсійнай групы партызанскай брыгады, падрываў варожыя эшалоны на чыгунках, быў удастоены медаля "Партызану Айчыннай вайны" 1-й ступені і ордэна Чырвонай Зоркі. Прабабуля Аляксея, Юран (Дарашкекіч) Леакадзія Георгіеўна, рызыкуючы жыццём, служыла партызанскай сувязной, здабываючы разведдадзеныя і медыкаменты для байцоў, і была ўзнагароджана Ордэнам Айчыннай вайны і баявымі медалямі. Прадзед Міхаіла Камісарчыка, Лапцеў Іларыён Аўдзеевіч, у баях з японскім Квантунскім войскам у жніўні 1945 года праявіў выключную мужнасць, знішчыў 19 варожых дотаў і ўдастоіўся за гераізм ордэна «Чырвонай Зоркі».
Усе гэтыя біяграфіі – выдатны матэрыял, які вучыць нас не забываць свае карані і сваю гісторыю. Мы вырашылі падрыхтаваць плакат і ў дакументальным стылі расказаць пра гэтых людзей, якія заслужылі нашу памяць і ўдзячнасць.
Паліна Краскоўская, студэнтка 3 курса спецыяльнасці "Мытная справа", стараста гуртка Cinemates
Дзякуй удзельнікам і арганізатарам гуртка за выдатную ініцыятыву. Спадзяемся, яна атрымае працяг у далейшай працы. Са свайго боку, адзначу, што для мяне было нечакана і вельмі прыемна ўбачыць сярод удзельнікаў гуртка Аляксея Няверава, праўнука маёй любімай настаўніцы, класнага кіраўніка нашага 10 "А" на працягу 6 гадоў Юран (Дарашкекіч) Леакадзіі Георгіеўны – ветэрана Вялікай Айчыннай вайны, Выдатніка народнай адукацыі БССР, цудоўнага выкладчыка рускай мовы і літаратуры.
Дзякуй, дарагія ўдзельнікі Cinemates, што падзяліліся інфармацыяй аб подзвігах і заслугах вашых блізкіх і беражліва захоўвайце памяць аб іх. Гэта сапраўды памяць сэрца.
С. А. Дубінка, канд. філалагічных навук, дацэнт, загадчык кафедры англійскай мовы міжнароднай прафесійнай дзейнасці
