28 красавіка 2026 года ў рамках Тыдня студэнцкай навукі на кафедры рамана-германскіх моў міжнароднай прафесійнай дзейнасці адбылося навуковае мерапрыемства – круглы стол "Іспанамоўны свет вачыма беларускіх даследчыкаў”. Арганізатарам і мадэратарам выступіла дацэнт кафедры, канд. філал. навук, дацэнт В. У. Сідарэвіч-Стахнова.
Удзельнікамі круглага стала сталі студэнты першага курса спецыяльнасці «Сусветная эканоміка», якія вывучаюць іспанскую мову ў якасці першай замежнай. Нягледзячы на пачатковы этап навучання, першакурснікі паспяхова справіліся з задачай: яны падрыхтавалі і прадставілі міні-даследаванні на іспанскай мове, пасля чаго адказалі на пытанні аўдыторыі і ўступілі ў навуковую дыскусію.
Галоўнай асаблівасцю круглага стала стаў яго патрыятычны аспект: кожны дакладчык не проста выкладаў факты аб іспанскім свеце, але і праводзіў паралелі з Беларуссю. Знаёмячыся з культурай Іспаніі і Лацінскай Амерыкі, студэнты нязменна звярталіся да ўласных традыцый, параўноўваючы, супастаўляючы і знаходзячы кропкі судакранання. Так, расказваючы пра традыцыйны аргентынскі напой матэ, яны ўспаміналі беларускі квас і бярозавы сок; гаворачы пра гісторыю танга, праводзілі паралелі з народнымі танцамі “Лявоніха” і “Крыжачок”; а вывучаючы гастранамічныя рэкорды Іспаніі, разважалі аб багацці беларускай кухні. Фестываль Ла Тамаціна быў супастаўлены з Купаллем: нягледзячы на вонкавыя адрозненні, абодва свята нясуць ідэю ачышчэння і абнаўлення. Паведамленні пра фламенку як пра «спосаб жыцця» іспанцаў, пра рэдкую іберыйскую рысь, якая жыве толькі ў Іспаніі, а таксама пра іспанскія вынаходкі, якія трывала ўвайшлі ў наш побыт, кожны раз завяршаліся параўнаннем з беларускімі рэаліямі: беларускім зубрам, трактарам «Беларус», народнай музыкай і танцамі. Такім чынам, студэнты вучыліся глядзець на іншую культуру не ізалявана, а праз прызму сваёй уласнай, што дазволіла ім лепш усвядоміць унікальнасць і каштоўнасць беларускіх традыцый.
Пасля кожнага выступу разгортвалася жывая дыскусія. Студэнты задавалі адно аднаму пытанні, удакладнялі дэталі, выказвалі сваё меркаванне і прапаноўвалі новыя паралелі з Беларуссю.
Падводзячы вынікі, Вольга Уладзіміраўна Сідарэвіч-Стахнова адзначыла, што першакурснікі даказалі: нават на пачатковым этапе вывучэння мовы магчымы сур'ёзныя міжкультурныя даследаванні. Яна падкрэсліла, што студэнты не толькі пашырылі свой кругагляд, але і навучыліся прадстаўляць Беларусь на іспанскай мове, усвядомілі ўнікальнасць роднай культуры. Па словах арганізатара, менавіта такіх спецыялістаў – адкрытых для свету, але пры гэтым глыбока паважаючых свае карані – кафедра імкнецца выхоўваць у працэсе навучання замежным мовам.
