23 красавіка 2026 г. студэнты 1-га і 2-га курсаў спецыяльнасці "Сусветная эканоміка" пад кіраўніцтвам старшага выкладчыка кафедры рамана-германскіх моў міжнароднай прафесійнай дзейнасці А.А. Чарняўскага наведалі Рэспубліканскі тэатр беларускай драматургіі і паглядзелі спектакль "Хатыня" паводле аповесці Алены Кобец-Філімонавай "Жаваранкі над Хатынню" ў пастаноўцы Аляксандра Бародка.

Спектакль распавядае пра жыхароў невялікай вёскі, якія жывуць прадчуваннем бяды, пра няпросты выбар людзей ва ўмовах акупацыі, пра кволыя мары і надзеі, якім не наканавана было спраўдзіцца. Атмасфера пастаноўкі, пабудаванай на ўнутраным напружанні і «ціхай» драме, зрабіла моцнае эмацыйнае ўражанне на гледачоў і заахвоціла іх задумацца аб кошце чалавечага жыцця, стойкасці і адказнасці перад мінулым.

Пасля спектакля адбылося абмеркаванне ўбачанага: гаварылі аб значэнні Хатыні для гістарычнай памяці Беларусі, аб ролі мастацтва ў асэнсаванні траўматычнага мінулага і выхаванні грамадзянскай адказнасці. Наведванне РТБД і знаёмства са спектаклем “Хатыня” стала важнай часткай культурна-адукацыйнай работы са студэнтамі і садзейнічала фарміраванню ў іх больш глыбокага і чалавечага погляду на гісторыю ўласнай краіны і яе месца ў свеце.