З 31.10 па 07.11 у Мінску чарговы раз жыццё адмяралася кінаметрамі: у культурнай сталіцы Беларусі прайшоў юбілейны кінафестываль "Лістапад". Галоўная кінападзея адыходзячага года прыцягвае ўсё больш і больш аматараў сучаснага кіно. Сярод такіх і студэнты ФМА.
Студэнты, якія вывучаюць партугальскую мову, з выкладчыкам Сіняўскай Ю.І. у рамках знаёмства з культурай партугаламоўнага свету наведалі спецыяльны паказ бразільскага фільма "Час вод" (парт.: "Enquanto o Céu Não Me Espera"). Кінастужка, якая ўвайшла ў праграму Міжнароднага кінафестывалю "Лістапад-2025", прысвечана жыццёвым выпрабаванням жыхароў прыбярэжных паселішчаў Амазонкі. Мерапрыемства, якое адбылося 8 лістапада, дазволіла навучэнцам пагрузіцца ў актуальную праблематыку Бразіліі, а таксама практыкаваць успрыманне бразільскага варыянту партугальскай мовы на слых. Гэты культурна-адукацыйны вопыт садзейнічае фарміраванню ў будучых спецыялістаў-міжнароднікаў комплекснага разумення сучасных выклікаў і рэалій у партугаламоўных краінах, паглыбляючы іх лінгвістычную і краіназнаўчую падрыхтоўку.
Іспанамоўныя студэнты (групы 2 МП 2 і 1 МП 2) выкладчыка Дворкінай К.Ю., а таксама студэнты, якія вывучаюць французскую мову пад кіраўніцтвам Кудзеліч Г. П., наведалі паказ фільма вытворчасці Іспаніі, Францыі і Марока пад назвай «Сірат». Фільм пачынаецца ў мараканскай пустыні. Менавіта сюды, у атмасферу поўнай страты арыенціраў, трапляюць Луіс (Сержы Лопас) і яго сын Эстэбан (Бруна Нуньес) у пошуках дачкі і сястры, якая знікла пяць месяцаў таму. След у ночы аказваецца зыбкім, і з гэтага моманту "Сірат" ператвараецца ў медытатыўнае падарожжа, дзе дарога — не столькі маршрут, колькі спосаб існавання. Назва фільма адсылае да ісламскай легенды аб мосце над Пеклам, што вядзе ў Рай, які душа павінна перайсці пасля смерці. Але шлях гэты надзвычай складаны, бо мост танчэйшы за волас і вастрэйшы за мяч. І не кожнаму пашчасціць яго пераадолець. Фільм адлюстроўвае сучасную карціну свету, дазваляе адчуць і вызначыць асаблівасці менталітэту персанажаў, а таксама вучыць задумацца над філасоўскімі канцэптамі быцця. Па выніках прагляду студэнты атрымалі адпаведныя заданні па тэме.
