16 красавіка 2025 года магістранты факультэта міжнародных адносін БДУ пад кіраўніцтвам заг. кафедры дацэнта С. А. Дубінка прынялі ўдзел у тэматычным экскурсійным маршруце па Мінску, прымеркаваным да дзвюх важных падзей — 30-годдзя заснавання нашага факультэта і 80-годдзя Перамогі ў Вялікай Айчыннай вайне. Мерапрыемства праводзілася ў рамках Тыдня навукі.
Экскурсія ахапіла знакавыя гісторыка-культурныя мясціны і навуковыя цэнтры сталіцы. На кожным участку маршруту магістранты-ўдзельнікі дзяліліся цікавымі фактамі і гісторыямі, звязанымі з іх мінулым і сучаснасцю. Кожны магістрант з групы загадзя падрыхтаваў на англійскай мове інфармацыю, выкарыстоўваючы гістарычныя і навуковыя крыніцы. Экскурсія пачалася ў аўдыторыі з абмеркавання значных падзей у жыцці факультэта міжнародных адносін, які хутка будзе адзначаць свой 30-гадовы юбілей.
Першым пунктам маршруту па-за аўдыторыяй стаў Беларускі дзяржаўны ўніверсітэт (The Belarusian State University), пра які расказала магістрантка. Яна адзначыла значнасць універсітэта як вядучага навуковага, адукацыйнага і культурнага цэнтра Беларусі, а таксама яго ўклад у станаўленне нацыянальнай сістэмы вышэйшай адукацыі. Асаблівая ўвага была ўдзелена ўнёску першага рэктара Уладзіміра Пічэты, а таксама ролі БДУ ў гады вайны і ў аднаўленчы перыяд.
Затым група накіравалася да плошчы Перамогі (Victory Square in Minsk), дзе іншая магістрантка прадставіла падрабязны аповед пра Абеліск Перамогі — цэнтральны элемент плошчы, узведзены ў 1954 годзе. 38-метровы манумент, абліцаваны шэрым гранітам і ўвенчаны ордэнам Перамогі, упрыгожаны бронзавымі барэльефамі работы вядомых скульптараў А. Бембеля, З. Азгура, С. Селіханава і А. Глебава. Каля падножжа абеліска гарыць Вечны агонь, запалены 3 ліпеня 1961 года Героем Савецкага Саюза генералам А.С. Бурдзейным. Пад плошчай знаходзіцца мемарыяльная зала, адкрытая ў 1985 годзе да 40-годдзя Перамогі, дзе размешчана шкляная вяночная кампазіцыя і бронзавая сцяна з імёнамі 566 Герояў Савецкага Саюза, якія загінулі за вызваленне Беларусі. Архітэктурнае аблічча плошчы было сфарміравана ў 1930–1950-х гадах пры ўдзеле М. Барша, Л. і Г. Аранаўскас, Г. Заборскага і Л. Мацкевіча.
Наступным прыпынкам стала плошча Якуба Коласа і архітэктурны ансамбль (Yakub Kolas Square and Architectural Еnsemble in Minsk), пра якую расказала студэнтка магістратуры. Плошча, названая ў гонар вялікага беларускага паэта, размешчана на скрыжаванні праспекта Незалежнасці і вуліцы Якуба Коласа на месцы гістарычнай вёскі Камароўка. Цэнтральным элементам ансамбля з'яўляецца помнік Якубу Коласу, адкрыты ў 1972 годзе да 90-годдзя з дня яго нараджэння. Скульптурная кампазіцыя працы Заіра Азгура і архітэктараў Юрыя Градава, Георгія Заборскага і Леаніда Левіна ўключае фігуру паэта і дзве групы персанажаў з яго твораў "Сымон-музыка” і “Дзед Талаш”. Плошча акружана будынкамі ў стылі сталінскага ампіру і культурнымі аб'ектамі, уключаючы Беларускую дзяржаўную філармонію.
Магістрантка расказала пра гісторыю дзвюх вядучых тэхнічных ВНУ сталіцы: БДУІР (The Belarusian State University of Informatics and Radioelectronics) і БНТУ (The Belarusian National Technical University), адзначыўшы іх ключавую ролю ў падрыхтоўцы інжынерных кадраў, развіцці тэхнічнай думкі і міжнароднай адукацыйнай інтэграцыі.
Завяршылася экскурсія каля НАН Беларусі (The National Academy of Sciences of Belarus), дзе магістрантка падкрэсліла ролю Акадэміі як галоўнай навуковай установы краіны, заснаванай у 1922 годзе. Адмысловая ўвага была нададзена міжнароднай дзейнасці акадэміі і яе ўдзелу ў найбуйных сусветных навуковых асацыяцыях. Мерапрыемства прайшло ў цёплай і пазнавальнай атмасферы, дазволіўшы ўдзельнікам не толькі паглыбіць веды аб гісторыі і культуры горада, але і выказаць павагу подзвігу тых, хто змагаўся за свабоду і мір.
Падрыхтаваны для экскурсіі матэрыял будзе выкарыстаны ў навучальным працэсе.
{gallery}2025/2025_04_16_03{/gallery}