15 красавіка на факультэце міжнародных адносін у рамках Тыдня студэнцкай навукі адбылася ролевая гульня ў форме інсцэніроўкі судовага працэсу ў рамках вучэбнай праграмы па тэме "Калегія прысяжных засядацеляў як важны інстытут краін з сістэмай агульнага права". Мерапрыемства падрыхтавалі выкладчыкі кафедры англійскай мовы міжнароднай прафесійнай дзейнасці і правялі ў групах студэнтаў 1-га курса спецыяльнасці "Міжнароднае права", якія працягваюць вывучаць англійскую мову ў якасці другой замежнай.
Непасрэднымі арганізатарамі выступілі кандыдат педагагічных навук, дацэнт Міхаіл Васільевіч Натуркач і старшы выкладчык, магістр міжкультурнай камунікацыі Святлана Уладзіміраўна Салаўёва.
Удзельнікі атрымалі ўнікальную магчымасць не проста азнаёміцца з асаблівасцямі функцыянавання суда прысяжных засядацеляў, але і прайграць яго работу ў касцюміраваным фармаце дзелавой гульні на аснове навучальнага кейса з наступным абмеркаваннем яго пераваг і недахопаў як прававога інстытута.
Усе ролі былі загадзя размеркаваны сярод студэнтаў: у зале судовых пасяджэнняў прысутнічалі суддзя, бакі абвінавачання і абароны, сведкі і прысяжныя засядацелі.
Удзельнікі падышлі да мерапрыемства з асаблівай увагай да дэталяў: суддзя выступаў у парыку і мантыі, пракурор, адвакат і сведкі рыхтавалі выступленні на англійскай мове і выкарыстоўвалі адпаведную прафесійную лексіку.
У працэсе дзелавой гульні бакі абвінавачання і абароны дапытвалі сведкаў, фармулявалі аргументы, давалі доказы, спрабуючы пераканаць калегію прысяжных засядацеляў у сапраўднасці свайго пункту гледжання. Можна з упэўненасцю сказаць, што інсцэніраваны судовы працэс насіў спаборніцкі характар, меў міждысцыплінарную накіраванасць, аб'яднаўшы ў сабе прававы, лінгвістычны і культуралагічны аспекты.
Студэнты пакінулі станоўчыя водгукі аб мерапрыемстве. Прывядзем меркаванні яго асобных актыўных удзельнікаў.
«Дзякуючы дзелавой гульні я змагла істотна пашырыць свой слоўнікавы запас юрыдычнай лексікі на англійскай мове. Праца з прававымі тэрмінамі зрабіла навучальны працэс нашмат цікавейшым”. ( студэнтка 1 курса спецыяльнасці "Міжнароднае права").
«Асабліва каштоўным для мяне стаў удзел у публічных выступах. Гэта выдатны спосаб развіць навыкі аргументацыі і ўменне выступаць перад аўдыторыяй, што надзвычай важна для юрыста-міжнародніка». ( студэнт 1 курса спецыяльнасці "Міжнароднае права").
"Удзел у гульні садзейнічаў развіццю навыку пераканання: больш дакладна выкладаць аргументы, падбіраць пераканаўчыя фармулёўкі і ўпэўнена адстойваць сваю пазіцыю ў рамках прафесійнага дыялога". ( студэнт 1 курса спецыяльнасці "Міжнароднае права").
Напрыканцы мерапрыемства выкладчыкі і студэнты абмеркавалі тое, наколькі па-рознаму можа ўспрымацца інстытут суда прысяжных засядацеляў у залежнасці ад культурнага і прававога кантэксту, і якія цяжкасці могуць узнікаць пры яго прымяненні. Фармат дзелавой гульні даў магчымасць удзельнікам па-новаму зірнуць на функцыянаванне прававых сістэм.
Мерапрыемства стала каштоўным навучальным досведам, які аб'яднаў веды ў галіне права, англійскай мовы і міжкультурнай камунікацыі.
Такія ініцыятывы дазваляюць студэнтам фармаваць прафесійныя навыкі і кампетэнцыі ў жывым, практыка арыентаваным фармаце і робяць адукацыйны працэс больш насычаным.
Арганізатары мерапрыемства выказваюць падзяку загадчыку кафедры англійскай мовы міжнароднай прафесійнай дзейнасці, кандыдату філалагічных навук, дацэнту Святлане Аляксееўне Дубінка за кансультатыўную дапамогу ў арганізацыі і правядзенні інсцэніраванага судовага працэсу, студэнтам 2 курса спецыяльнасці «Міжнароднае права» за каардынацыю падрыхтоўчай работы над вучэбным кейсам, актыўным удзельнікам — студэнтам 1 курса спецыяльнасці "Міжнароднае права" — і ўсім прысутным на пасяджэнні.
Сумесныя намаганні выкладчыкаў і студэнтаў дазволілі зрабіць інсцэніраваны судовы працэс яскравай і запамінальнай падзеяй Тыдня студэнцкай навукі на факультэце міжнародных адносін БДУ і праявіць свае лепшыя дзелавыя і асобасныя якасці і здольнасці!
{gallery}2025/2025_04_15_03{/gallery}