27 сакавіка кафедра англійскай мовы гуманітарных спецыяльнасцяў правяла для студэнтаў першага курса аддзялення "Міжнародныя адносіны", якія вывучаюць англійскую мову як першую замежную, віктарыну «Britain&America: across countries, cultures and borders». Удзельнікі былі аб'яднаны ў каманды па «волі выпадку», г.зн. папярэдне кожны ўдзельнік павінен быў выцягнуць каляровую картку, якая і вызначала яго каманду. Гэта было прадугледжана арганізатарамі віктарыны, бо дадзены псіхалагічны метад накіраваны на выпрацоўку ў студэнтаў умення мабілізавацца і працаваць у нязвыклых для іх умовах, выяўляючы свае здольнасці як лідэра сярод малазнаёмых людзей.
Пытанні для віктарыны былі падрыхтаваныя дасведчанымі студэнтамі 3 курса спецыяльнасці "Міжнародныя адносіны" Карынай Ярмашук і Станіславам Вішнеўскім, якія валодаюць бясконцым творчым патэнцыялам, энтузіязмам і жаданнем падзяліцца сваімі ведамі. Першакурснікі змаглі ў спаборніцкай атмасферы праверыць свае веды па наступных катэгорыях пытанняў: «геаграфія», «гісторыя», «дзяржаўны ўклад», «культура і мастацтва» Вялікабрытаніі і ЗША, узбагаціць свае веды і высветліць спрэчныя пытанні. У кожнай катэгорыі было па 15 пытанняў з рознай ступенню складанасці, колькасцю секунд на абдумванне і, адпаведна, колькасцю запаветных балаў, якія прысуджваліся ў «скарбонку» каманд за правільны адказ. Дух здаровай канкурэнцыі і запалу прысутнічаў у кожным удзельніку.
Кожная каманда выпрацоўвала ўласную тактыку: хтосьці выбіраў толькі самыя «дарагія» пытанні, хтосьці адразу ўздымаў картку, а потым абдумваў правільны адказ ... Нялегка было і членам журы, у склад якога ўваходзілі загадчык кафедры англійскай мовы гуманітарных спецыяльнасцяў І. М. Івашкевіч, старэйшыя выкладчыкі кафедры І. А. Лясоўская, Т. В. Балакшына, а таксама пераможца супер-пытання ў мінулагодняй віктарыне студэнт 2 курса МА Раман Курбека, паколькі ім трэба было вельмі хутка адзначаць катэгорыю, пытанне і колькасць балаў. Вялікі дзякуй арганізатарам віктарыны, якія распрацавалі зручныя табліцы для журы! Дзякуй Сяргею Валер'евічу Карэліну, які наведаў наша мерапрыемства!
У лідэраў каманд таксама была магчымасць заваяваць дадатковыя, нярэдка вырашальныя лёс каманд, балы, паўдзельнічаўшы ў «Конкурсе капітанаў», які прайшоў у складаным і інтрыгуючым фармаце бліц-апытання і складаўся з 10 пытанняў. Пытанні задаваліся ў хуткім тэмпе. І гэта было яшчэ адно выпрабаванне!
Пасля напружанай віктарыны, падчас падліку членамі журы балаў, вядучыя далі правільныя адказы на тыя пытанні, дзе былі дапушчаныя памылкі ў ходзе віктарыны.
Выкарыстанне мультымедыйных тэхналогій, інавацыйная структура сцэнарыя конкурсу, часовая рэгламентацыя, а таксама шчырае жаданне студэнтаў атрымаць перамогу ўпрыгожылі і надалі асаблівую значнасць гэтаму мерапрыемству.
У выніку, усе члены каманды-пераможцы віктарыны Аляксандр Навіцкі, Маргарыта Левановіч, Аліна Ляўковіч, Ганна Калічава і капітан Ніно Квернадзе, якая набрала найбольшую колькасць балаў у бліц-апытанні, былі ўзнагароджаны памятнымі дыпломамі. А напрыканцы было зроблена цёплае сумеснае фота.
Студэнты асабліва адзначылі высокі прафесіяналізм выкладчыкаў кафедры англійскай мовы гуманітарных спецыяльнасцяў, і, у значнай ступені, ініцыятара гэтага праекта, старшага выкладчыка С. А .Зудавай.
Важна адзначыць, што і для саміх арганізатараў конкурс ўнёс неацэнны ўклад у іх самаразвіццё: студэнты змаглі асвяжыць свае веды як па ключавых, так і па спрэчных пытаннях лінгвакраіназнаўства, рэалізаваць свой творчы патэнцыял, задзейнічаўшы крэатыўны падыход да складання пытанняў і афармлення прэзентацыі, удасканаліць навыкі аратарскага майстэрства і публiчных выступленняў.
Віктарыны па гісторыі, геаграфіі і культуры ЗША і Вялікабрытаніі ўжо сталі на кафедры традыцыйнымі. Старшакурснікам удалося зрабіць віктарыну насычанай і паказаць першакурснікам прыклад. У наступным годзе менавіта яны будуць працягваць гэтую традыцыю і апынуцца «ля мікрафона», паспрабуюць сябе ў распрацоўцы і правядзенні падобнага мерапрыемства.
Хочацца верыць, што такія мерапрыемствы — гэта ўражанне, якое застаецца пра студэнцкія гады на ўсё жыццё.
Ніно Квернадзе (1 курс МА), Аляксандр Навіцкі (1 курс МА), Ганна Калічава (1 курс МА), Карына Ярмашук (3 курс МА)
