9 кастрычніка ў Мінску адбылася VI Міжнародная навукова-практычная канферэнцыя "Інтэлектуальная ўласнасць у сучасным свеце: выклікі часу і перспектывы развіцця". Арганізатарамі канферэнцыі выступілі Дзяржкамітэт па навуцы і тэхналогіях Рэспублікі Беларусь, Нацыянальны цэнтр інтэлектуальнай уласнасці і Еўразійская патэнтная арганізацыя.
На канферэнцыі абмяркоўваліся найбольш актуальныя праблемы права і эканомікі інтэлектуальнай уласнасці. Асноўнымі тэматычнымі напрамкамі сталі:
- крэатыўныя індустрыі і прамысловая ўласнасць;
- лічбавыя тэхналогіі і аўтарскае права;
- баланс інтарэсаў аўтараў, праваўладальнікаў і карыстальнікаў.
У канферэнцыі прынялі ўдзел супрацоўнікі кафедры міжнароднага права, а таксама студэнты спецыяльнасці "Міжнароднае права".
Дацэнт кафедры міжнароднага права Лосеў С.С. выступіў з дакладам «Трохступенчаты тэст» як крытэрый дапушчальнасці абмежаванняў выключнага аўтарскага права», у якім даў ацэнку новаму для айчыннага аўтарскага права інстытуту прымусовай ліцэнзіі, а таксама абгрунтаваў адпаведнасць дадзенага механізму абмежавання выключнага права палажэнням міжнародных дамоваў Рэспублікі Беларусь.
